Хойлунд МЮда қолишни ва асосий таркиб учун курашишни истамоқда

"Манчестер Юнайтед" ҳужумчиси Расмус Хойлунд жамоада қолиб, асосий таркиб учун курашиш ниятида эканини маълум қилди. Аввалроқ унга "Милан" ва "Ювентус" қизиқиш билдиргани хабар қилинган эди.

"Менинг режам жуда аниқ — нима бўлмасин, қолиш ва ўрним учун курашиш. Мен рақобатга тайёрман. Бу менга куч бағишлайди. Ўзимни тетик ҳис қиляпман ва бўлаётган барча жараёнларни қабул қиламан.

Мен ҳали жуда ёшман, баъзан одамлар буни унутиб қўяди. Мен ҳали 22 ёшман. Ҳар бир ҳужумчи ҳам шу ёшга келиб 100 та гол ура олмайди. Аммо мен кўп нарса ўргандим ва ўйинларим орқали бунга гувоҳ бўляпсизлар. Мен ривожлана бошлаяпман.

Ўтган мавсум ҳаммамиз учун оғир кечди. Ҳамма мен кўпроқ натижа кўрсатишим кераклигини тушунади. Бироқ, футбол жамоавий ўйин. Энди биз яхшироқ ўйнашни мақсад қилганмиз. Тўғри йўналишдамиз ва олдимизда нима кутяпти, шунга қизиқиш билан қараяпмиз" — дея таъриф бериб ўтди даниялик форвард.