"Футболни қўллаб-қувватлаш биз учун келажакка инвестиция" ёхуд ЎФА янги ҳамкорга эга бўлди

ЎФА матбуот хизматининг маълум қилишича, “Uzum” миллий рақамли экотизими Ўзбекистон футбол ассоциацияси билан ҳамкорлик доирасида жаҳон чемпионатига тайёргарлик кўраётган Ўзбекистон миллий терма жамоасини ҳамда бутун мамлакат бўйлаб футболни ривожлантиришни қўллаб-қувватлайди.

“Uzum”нинг қўллаб-қувватлаши ассоциациясига спорт инфратузилмасини мустаҳкамлаш, ёшлар учун дастурларни кенгайтириш, шунингдек, миллий терма жамоани 2026 йилги жаҳон чемпионатига тайёргарлик кўришда қўллаб-қувватлаш имконини беради. Ўзбекистон миллий терма жамоасининг таниқли футболчилари ЎФА ва миллий рақамли экотизимнинг қўшма лойиҳаларида иштирок этиб, ўз намуналари билан ёшларни илҳомлантирадилар.

Бугунги кунда ЎФА қошида 14 та ҳудудий ассоциация фаолият юритмоқда, 12,000 дан ортиқ футболчи болалар ва ўсмирлар жамоаларида машғулот ўтказмоқда, миллий терма жамоа эса халқаро майдонда — Осиё кубоги, жаҳон чемпионати ва Олимпиада саралаш учрашувларида Ўзбекистон шарафини ҳимоя қилиб келмоқда.

“Uzum” компанияси билан ҳамкорлик мамлакатимизда футболни ривожлантиришда муҳим қадамдир. Келгуси йилларда миллий терма жамоалар, шунингдек, болалар ва аёллар футболини қўллаб-қувватлаш бўйича қўшма лойиҳаларни ҳам амалга оширамиз”, — дейди Ўзбекистон футбол ассоциацияси биринчи вице-президенти Равшан Ирматов.

"Uzum" экотизими асосчиси ва бош директори Жасур Жумаев эса ҳамкорликнинг аҳамиятини алоҳида таъкидлади:

“Биз учун нафақат спортни қўллаб-қувватлаш, балки иқтидорли болалар ўсиши, амалдаги чемпионлар эса янги ғалабалар учун ресурсларга эга бўлишига шароит яратиш муҳимдир. Футбол одамларни бирлаштиради ва ўз кучига ишончни оширади. Биз ЎФА билан биргаликда ўзбек спорти келажагига ҳисса қўша олишимиздан фахрланамиз”.

“Футболни қўллаб-қувватлаш биз учун келажакка инвестиция. Спорт инфратузилмасини ривожлантириш, футболчилар ва мухлислар учун янги имкониятлар яратиш орқали биз футбол миллионлаб ўзбекистонликларнинг кундалик ҳаётига айланишини истаймиз. Ишончимиз комилки, футбол ассоциацияси билан биргаликда янги ғалабалар ва ёрқин спорт тарихига пойдевор қўя оламиз”, – деди “Uzum Bank” кузатув кенгаши раиси Расулжон Ғуломов.