"Арсенал" "Барса"нинг ишончли ҳимоячисини олиб келмоқчи

Лондоннинг "Арсенал" клуби "Барселона" ҳимоячиси ҳисобланган Жюль Кундени олиб келиш ҳақида ўйламоқда. Бу ҳақида "Тhe Sun" нашри хабар бермоқда. 
 
Маълумотларга кўра, Микель Артета бошчилигидаги "канонирлар" ҳимоя чизиғини кучайтириш мақсадида бир неча футболчиларни харид қилишмоқчи. Ҳозирда энг асосий вариант сифатида каталониянинг "Барселона" клуби ҳимоячиси ҳисобланган Кундени қўлга киритиш учун жиддий қизиқиш билдирмоқда. Манбага кўра, "тўпчилар" франциялик футболчи учун 55 миллион евро таклиф қилмоқчи. 
 
Маълумот ўрнида, 26 ёшли фулбек жорий мавсум "кўк-анорранглилар" сафида 51 та учрашувда иштирок этиб, 3 та гол ва 8 та голли узатмага муаллифлик қилган. Унинг клуб билан шартномаси 2027 йилгача мўлжалланган бўлиб, 60 миллион евро деб баҳоланмоқда.