250 миллион еврога АПЛнинг уч юлдузини оламиз!

Саудия Арабистонининг энг қудратли клублари ёзги трансферлар даврида Европада порлаётган ўйинчиларни ўз чемпионатларига олиб кетишга ҳаракат қилади.

Бир неча манбаларнинг ёзишича, “Ал-Ҳилол” ва “Ал-Аҳли” таркибини кучайтириш мақсадида Англия Премьер-лигасидан уч нафар футболчини трансфер қилиш учун умумий ҳисобда 250 миллион евро миқдорида пул сарфлашга тайёр.

“Ал-Ҳилол”нинг ёздаги асосий нишони Юри Тилеманс бўлади. “Астон Вилла”да ўйнаётган бельгиялик ярим ҳимоячини олиш учун шайхлар 45 миллион евро тикишни мўлжаллаяпти.

Бундан ташқари, “Ал-Ҳилол” раҳбарлари “Ньюкасл”дан Бруну Гимарайншни олиб кетмоқчи. Араблар бу трансфер ўта қийинлигига қарамай, бразилиялик ўйинчи учун рекорд сумма – 140 миллион евро харажат қилишга рози бўлган.

“Ал-Аҳли” эса, эътиборини “Манчестер Юнайтед” сардори Бруну Фернандешга қаратди. Улар португалиялик ўйинчи учун Англия клубига 65 миллион евро таклиф қиляпти.

Экспертларнинг таъкидлашича, “Ал-Ҳилол” ва “Ал-Аҳли” режалаштирилган трансферларни амалга ошира олса, бу уч футболчининг келиши Саудия Арабистони профессионал лигаси имижини янги босқичга кўтаради.