Шомуродовга ҳазил қилган Раньери нима деди?
- 17-феврал 2025, 08:00
- Zohir Toshxo’jayev
- 0
- Футбол
Тажрибаои мураббий Клаудио Раньери “Рома”ни қабул қилиб олганидан кейин жамоа ўйинида ижобий ўзгаришлар ясай олгани натижалардан ўз аксини топмоқда.
А Серияда “Рома”да янги йилда ҳали мағлубиятга учрагани йўқ. Сўнгги мағлубият 15 декабрь куни “Комо”дан қабул қилиб олинган эди. Шундан бери римликлар олтита ғалаба ва учта дуранг қайд этди.
“Милан” ҳамда “Наполи” каби қудратли клублар ҳам “Рома”ни енгиш йўлини тополмади ва очко бўлишишга мажбур бўлди.
25-турда пойтахтлик “бўрилар” сафарда “Парма” жамоаси меҳмони бўлди. Бу баҳсда Клаудио Раньери олдинги чизиқни Элдор Шомуродов ва Матиас Сулега топширди. Иккала ҳужумчи ҳам мезбон ҳимоячиларни анча қийнади.
Беллашувнинг кульминацион нуқтаси 31-дақиқага тўғри келди. Элдор Шомуродов бир пас билан Матиас Сулени жуда қулай позицияга чиқарди. Аргентиналик ҳужумчи дарвозабон билан бирга бир вазиятга чиқиб бораётганида “Парма” ҳимоячиси Жованни Леони уни чалиб йиқитди.
Ҳакам бу вазиятда Леонига қизил карточка кўрсатиб, “Парма” дарвозасига жарима тўпи белгилади. Суленинг ўзи ажойиб ва аниқ зарба йўллади. Бу гол учрашув охирига қадар ягоналигича қолди.
Элдор Шомуродов тўлиқ ўйнаган учрашувда жуда фаол ва яхши ҳаракат қилди. Бироқ легионеримиз биринчи бўлимда сирпанчиқ майдонда бир неча бор оёғи тойиб йиқилди. Ана шундай вазиятларнинг бирида Клаудио Раньери шогирдига ҳазил қилди.
Раньери захира ўриндиғидаги ўйинчилар ва ходимларга қарата: “Элдорнинг бутсаси тагига сирпанчиқ мум суртиб қўйганмисизлар?”, деб ҳазиллашди.
Таъкидлаш лозимки, қишки спорт турларида чанғи яхши сирпаниши учун унинг остига махсус мум билан ишлов берилади. Раньери Элдорнинг йиқилиб тушганига шу тариқа изоҳ берди.
Бу воқеага гувоҳ бўлган экспертлар “Рома”нинг ички муҳити жуда яхши эканини, Клаудио Раньери футболчилар билан дўстона алоқа ўрната олгани, мураккаб вазиятларда ҳам ўзаро муносабатлар ижобийлиги ва бу натижаларга яхши тарафдан таъсир қилаётганини таъкидламоқда.
“Рома” ҳозирча А Серияда 37 очко билан 9-ўринга кўтарилиб олди. Раньери шогирдларида Еврокубокларга йўлланма берадиган олтинчи поғона учун курашиш имконияти сақланиб қолган.
Бироқ римликлар асосий эътиборини Европа Лигасига қаратгани сир эмас. “Бўрилар” умумий босқичдан ўтиб, плей-оффнинг ўтиш ўйинида “Порту”га рўбарў келди.
Португалиядаги биринчи учрашувда “Рома” 1:1 ҳисобида дуранг ўйнади. Энди жамоалар Римдаги жавоб ўйинида кейинги босқич масаласини ҳал қилиши лозим. Бу баҳс 20 февралга белгиланган.
Элдор Шомуродов ҳақида тўхталсак, ҳамюртимиз жорий мавсум А Серия, Италия кубоги ва Европа лигасида жами 21 маротаба майдонга тушиб, бу мусобақаларнинг ҳар бирида биттадан гол урган ва бир бор голли пас узатган.