Бугун Шомуродов гол урмаса бўлмайди: Элдор аввалги иккита ўйинда бу ишни икки бор уддалаган!
- 18-октябр, 16:49
- Zohir Toshxo’jayev
- 0
- Футбол
Суперлиганинг 8-турида “Истанбул Башакшеҳир” ўз майдонида “Газиантеп” клубини қабул қилади.
Учрашув олдидан ҳар икки жамоа 8 очкодан жамғарган. Улар чемпионатда еттитадан ўйин ўтказиб, иккитадан ғалаба қозонган, иккитадан дуранг қайд этган ва уч марта мағлуб бўлган. “Башакшеҳир” бу учрашувларда 10 та гол уриб, ўз дарвозасидан 11 та тўп олиб чиққан. “Газиантеп” эса 7 та гол урган ва 10 та гол ўтказиб юборган.
Сўнгги ҳафталарда ҳар икки жамоа ҳам кутилган натижаларга эришишда қийналмоқда. “Башакшеҳир” Суперлигадаги охирги олтита учрашувнинг фақат биттасида ғалаба қозонган. Бу даврда жамоа икки марта дуранг ўйнаб, уч марта мағлуб бўлган. Ягона ғалаба ўз майдонида “Генчлербирлиги” устидан 4:0 ҳисобида қайд этилган.
“Газиантеп” эса чемпионатда кетма-кет учта ўйиндан бери ғалаба қозона олмаяпти. Жамоа сафарда “Гёзтепе”ни 4:2 ҳисобида мағлуб этганидан кейинги учта учрашувнинг бирида дуранг ўйнаган ва икки марта мағлуб бўлган. Бундан ташқари, “Газиантеп” сўнгги учта ўйинда бирорта ҳам гол ура олмаган.
“Башакшеҳир Фотиҳ Терим” стадионида ўтадиган учрашувни бош ҳакам Алпаслан Шен бошқариб боради. Ўйин Тошкент вақти билан 21:00 да бошланади.
“Истанбул Башакшеҳир” футболчилари “Газиантеп”га қарши Суперлигадаги сўнгги олтита ўйиннинг бештасида ғалаба қозонган, яна биттасида дуранг ўйнаган. Шунингдек, жамоа ушбу рақибга қарши кетма-кет учта учрашувда ғалаба қозониб келмоқда. Бунда техник мағлубиятлар ҳисобга олинмаган.
“Газиантеп” Суперлига доирасида “Истанбул Башакшеҳир” майдонида ўтказган олтита учрашувнинг бирортасида ҳам ўз дарвозаси дахлсизлигини сақлаб қола олмаган. Бу ўйинларда жамоа бир марта ғалаба қозонган ва беш марта мағлуб бўлган. Сафардаги ягона ғалаба 2020 йил декабрь ойида 2:1 ҳисобида қайд этилган.
“Истанбул Башакшеҳир” Суперлигадаги сўнгги 10 та уй учрашувининг фақат биттасида мағлуб бўлган. Қолган ўйинларнинг еттитасида ғалаба қозонган ва иккитасида дуранг ўйнаган. Ягона мағлубият жорий мавсумнинг тўртинчи турида “Галатасарой”га қарши учрашувда — 2:3 ҳисобида қайд этилган.
“Газиантеп” Суперлигада Истанбул жамоаларига қарши сафарда ўтказган сўнгги олтита учрашувнинг фақат биттасида ғалаба қозонган. Бу даврда икки марта дуранг қайд этилган ва уч марта мағлубият кузатилган. Жамоа Истанбулдаги сўнгги сафарида “Эюпспор”ни 1:0 ҳисобида мағлуб этган. Бироқ «Газиантеп» олий дивизион доирасида Истанбулда ўтказган сўнгги иккита сафар ўйинида ҳам дарвозаси дахлсизлигини сақлаб қола олмаган.
“Истанбул Башакшеҳир” ҳужумчиси Элдор Шомуродов учун “Газиантеп” қулай рақиб ҳисобланади. Ўтган мавсумда ўзбек форварди бу жамоага қарши Суперлиганинг иккита учрашувида учта голли ҳаракатни амалга оширган: иккита гол урган ва битта голли узатма берган.
Ўтган чемпионатда 22 та гол билан Суперлига тўпурари бўлган Элдор Шомуродов бу мавсумда ҳам “Олтин бутса” учун курашни давом эттирмоқда. Айни пайтда Туркия чемпионати тўпурарлари баҳсида еттитадан гол урган Муҳаммад Салоҳ, Гифт Орбан ва Ведат Мурики етакчилик қилмоқда. Уларни таъқиб этиб келаётган Элдор Шомуродов, Виктор Осимхен ва Душан Влахович ҳисобида олтитан гол бор.
Тахминий таркиблар:
“Истанбул Башакшеҳир”: Муҳаммад, Карбовник, Ҳамза, Ба, Харебашвили, Умут Гюнеш, Кемен, Брник, Олсен, Элдор Шомуродов, Бертуғ.
“Газиантеп”: Тобиас, Перес, Абена, Силла, Керим, Гидадо, Максим, Козловски, Сореску, Ҳансен, Ҳалил.