Мадриднинг “Реал” клуби ҳужумчиси Килиан Мбаппе 2026 йилнинг ёзида АҚШ, Канада ва Мексикада ўтадиган жаҳон чемпионатида ўйнаш истаги сабабли тиззасини операция қилдиришдан бош тортяпти.
Бу ҳақда AS нашри хабар берди.
Манба маълумотига кўра, франциялик форвард 2025 йилнинг декабридан буён тизза боғламлари билан муаммоларга дуч келмоқда. Мбаппе Чемпионлар лигаси плей-офф босқичининг “Бенфика”га қарши жавоб ўйинини (2:1) ўтказиб юборди.
Шу билан бирга, ҳужумчи операциядан қочмоқчи, чунки жарроҳ амалиётидан кейин тикланиш жараёни узоқ муддат давом этади ва бу ҳолат унинг жаҳон чемпионатида иштирокини шубҳа остига қўйиши мумкин. Футболчи консерватив даволаниш вариантини танлаган.
Мбаппе 2024 йил ёзидан бери “Реал” сафида ўйнамоқда. Илгари у “Пари Сен-Жермен” ва “Монако” клубларида тўп сурган. Жорий мавсумда ҳужумчи клуб миқёсида 33 та ўйинда иштирок этиб, 38 та гол урган ва олтита голли узатма амалга оширган.