Конго терма жамоасининг Жаҳон чемпионатига чиқиши ортидан клублар норози
- 4-апрел, 03:08
- Muhammadqodir Ruzmatov
- 0
- Футбол
Европанинг бир қатор клублари Конго терма жамоасининг Жаҳон чемпионатига чиқиши ортидан юзага келган вазиятдан норозилик билдирди.
Маълум бўлишича, жамоа 52 йиллик танаффусдан сўнг мундиалга йўл олганидан кейин мамлакатда дам олиш куни эълон қилинган. Шу сабабли футболчилар расмий тадбирларда иштирок этиш учун ушлаб қолинган ва ўз клубларига кечиккан ҳолда қайтишган.
ФИФА қоидаларига кўра, футболчилар терма жамоа йиғинидан сўнг 48 соат ичида ўз клублари ихтиёрига қайтиши шарт. Бироқ ушбу ҳолат қоидалар бузилишига сабаб бўлган.
Жумладан, “Лилль” клуби яқиндаги чемпионат ўйинида Шансель Мбембасиз ҳаракат қилишга мажбур бўлади. Клуб раҳбарияти бу ҳолатга кескин муносабат билдирди:
“Бу масала ФИФА интизом қўмитасига тақдим этилди. Бу клублар учун хавфли прецедент, чунки айнан клублар футболчиларга маош тўлайди”, — дейилади баёнотда.
Шунингдек, “Эспаньол” жамоаси Шарль Пикел хизматидан фойдалана олмади. Ўйинчиларнинг кечикиб қайтиши сабаб “Бетис”, “Эльче” ва “Кастельон” клублари ҳам муаммога дуч келган.