Энцо Фернандес "Реал" ҳақидаги миш-мишларга ишора қилди

"Челси" ярим ҳимоячиси Энцо Фернандес ўз баёноти орқали Мадриднинг "Реал" клубига эҳтимолий ўтиш ҳақидаги гап-сўзларни янада кучайтирди.

Аргентиналик футболчи Испания пойтахти унга жуда ёқишини очиқ айтди.

"Мен Мадридда яшашни хоҳлардим. Бу ажойиб шаҳар, у менга Буэнос-Айресни эслатади", — дея 25 ёшли футболчининг сўзларини журналист Фабрицио Романо келтирди.

Шундан сўнг унга аниқ қайси клуб ҳақида гапираётгани юзасидан савол берилганида, Энцо жавоб қайтармади ва фақат кулиб қўйиш билан чекланди.

Маълумки, Энцо Фернандес анча вақтдан буён "Реал" билан боғлаб келинмоқда.

Transfermarkt экспертлари унинг бозор қийматини 90 миллион евро деб баҳолаган. Унинг "Челси" билан амалдаги шартномаси 2032 йилнинг ўртасига қадар мўлжалланган.