“Барса” раҳбарияти “Сити” юлдузи билан келишувга эришди

“Манчестер Сити” сардори Бернарду Силванинг клуб билан ҳамкорлиги поёнига етиб бормоқда. Амалдаги шартнома 30 июнь куни тугайди.

Португалиялик юлдуз фаолиятини Испания чемпиони “Барселона” сафида давом эттиришга тайёр. У каталонияликларга ҳамкорлик борасида оғзаки розилик берган.

Бу ҳақда El Nacional нашри хабар берди.

31 ёшли Бернарду Силва Хосеп Гвардиола қўл остида 2017 йилдан бери ўйнаб келмоқда. У “шаҳарликлар” сафида клублар миқёсидаги барча турнирларда ғолиб чиққан.

Жорий мавсум Бернарду барча турнирларда 43 та ўйин ўтказиб, 3 та гол ва 5 та голли узатма қайд этган.

Сўнгги маълумотларга кўра, тажрибали плеймейкерни “Ювентус”, “Милан” ва “Галатасарой” ҳам ўз сафига қўшиб олиш истагини билдирган.