“Арсенал”: Жуда қаттиқ тарсаки едик!

Англия Премьер-лигасининг 32-турида чемпионат пешқадами “Арсенал” ўз майдонида “Борнмут”дан 1:2 ҳисобида мағлубиятга учраб, қимматли уч очкодан маҳрум бўлди. “Канонирлар” рақибга нафақат ҳисобда, балки ўйин бўйича ҳам ютқазди.

“Арсенал” бош мураббийи Микель Артета Борнмутга қарши мағлубиятни жамоаси учун “юзга урилган катта зарба”, деб атади.

Премьер-лиганинг ҳал қилувчи палласида “Арсенал”нинг етакчилиги тобора беқарор кўриниш олмоқда ва Артета ушбу ўйин “канонирлар” учун мутлақо омадсиз ўтганини тан олишга мажбур бўлди.

- Бу жуда хафа қилади. Бу юзга урилган катта зарба. Энди савол – биз бунга қандай жавоб берамиз?

“Борнмут”га ҳақини бериш керак, чунки улар бежизга 11 ўйиндан бери ютқазмаяпти. Уларда кўп жиҳатлар жойида. Биз эса биринчи бўлимда ўйинни ўқиш ва тўпни қайтариб олишни эплолмадик.

Рақиб биринчи имкониятиданоқ фойдаланиб, жарима майдонимизга кирди. Рикошет, ҳимоядаги ёмон ҳаракат ва бу голга олиб келди.

Буни руҳий жиҳатдан енгиш керак эди. Биз ўйинимизни тиклашга ва уларга босим ўтказишга ҳаракат қилдик, пенальтидан гол урдик, кейин бошқача ўйин бўлишини кутгандик.Аммо бугун биз жуда кўп тушунарсиз ҳаракатлар қилдик.

Шу пайтгача жуда барқарор эдик. Бу футбол, бундай ҳолатлар бўлиб туради, баъзан рақибнинг имкониятдан қандай фойдаланганини тан олиш керак. Улар неча марта зарба берганини билмайман, лекин ўз имкониятларидан максимал даражада фойдаланди, биз эса бугун ўз даражамиздан анча паст ўйнадик.

Футболчилар жуда қаттиқ аламда, шундай ҳам бўлиши керак. Буни матонат билан қабул қилиш керак, кейин эса икки йўл бор: ё ўрнингдан туриб курашни давом эттирасан, ёки чиқиб кетасан. Ҳозир айнан шу талаб қилиняпти.

Бу жуда муҳим ҳафта, кўп нарса ҳал бўлади. Биз ҳали ҳам икки мусобақада яхши ҳолатдамиз, лекин албатта янада кучайишимиз керак, - деди Микель Артета.