Англия терма жамоасини хорижлик машҳур мураббийларга беришади

Европа чемпионатидан кейин Англия терма жамоасининг 53 ёшли бош мураббийи Гарет Саутгейт ўз лавозимидан кетди.

Англия футбол ассоциацияси раҳбарияти ҳали янги бош мураббий масаласини ҳал қилганича йўқ. The Guardian нашрининг ёзишича, терма жамоа катта эҳтимол билан хорижлик мутахассис бошқарувига топширилади.

Манбага кўра, бу лавозимга Томас Тухель ва Маурисио Почеттинони таклиф қилиш режалаштирмоқда.

Англия футбол ассоциацияси бош мураббий масаласини тезроқ ҳал қилиши керак. Чунки терма жамоа 7 сентябрь куни Миллатлар лигасида Ирландия футболчиларига қарши майдонга тушиши лозим.