“Сити” арзон, лекин зўр футболчи олади

Истеъдодларга бой бўлган Португалия чемпионатида “Фамаликан” клуби шарафини ҳимоя қилаётган ярим ҳимоячи Гуштаву Са Европанинг гранд клублари эътиборини ўзига торта бошлади.

Calciomercato нашрининг ёзишича, ҳозирнинг ўзида 20 ёшли футболчига “Манчестер Сити” ва “Ювентус” жиддий қизиқиш билдирмоқда.

Гуштаву Са футбол сирларини “Порту”да ўргана бошлаган ва кейинроқ “Фамаликан” академиясига кўчиб ўтган. 2022 йилдан бери "Фамаликан" асосий жамоада ўйнаб келмоқда.

Гуштаву асосан майдон марказида ҳужумчи ортида ҳаракат қиладиган ўйинчи ҳисобланади. “Фамаликан” билан 2029 йилнинг 30 июнига қадар давом этадиган шартномага эга футболчининг трансфер суммаси 16 миллион еврони ташкил қилади.