“Барса” “эл-класико”даги мағлубият сабабини айтди

Испания чемпионатининг ўнинчи турида мамлакатнинг амалдаги чемпиони “Барселона” ашаддий рақиб “Реал” майдонида ўйнаб, учрашувда 1:2 ҳисобида мағлубиятга учради.

Мадридликларнинг голлари Килиан Мбаппе ва Жуд Беллингем ҳисобига ёзилган бўлса, каталонияликлардан Фермин Лопес жавоб тўпини киритди.

Бош мураббий Ханс-Дитер Флик дисквалификация туфайли ўйинда иштирок этмади. Унинг ўрнига жамоани бошқарган ёрдамчи мураббий Маркус Зорг баҳсдан кейин ўз фикрлари билан ўртоқлашди.

- Биз одатдагидан жуда кўп хато қилдик. Лекин ўйин охирида хавфли вазиятлар яратиш учун кучимиз кўпроқ қолганди. Ўйин услубини ўзгартиришга уриниб кўрдик, лекин ҳеч нарса ўхшамади. Ҳамма нарсани синаб кўрдик, лекин кутилган натижага эриша олмадик.

Ламин Ямал ҳақида нима дейишим мумкин? Унинг учун бу осон ўйин бўлгани йўқ. Табиийки, баъзан ўзини кўрсата олди, лекин рақиб ҳимоячилари жуда яхши ўйнади. Биз Ямал яқинда жароҳатдан тикланганини ва атиги 18 ёш эканини ҳам инобатга олишимиз керак.

Унга қарши мустаҳкам ҳимояланиб ўйнаса бўлади, лекин биз унинг салоҳиятини жуда яхши биламиз, - деди Маркус Зорг мағлубиятга изоҳ бериб.

“Эл-класико”дан кейин “Реал” очколари сонини 27 тага етказиб, мусобақа жадвалида пешқадамлик мавқеини мустаҳкамлаб олди. “Барселона” эса, энди мадридликлардан беш очкога ортда қолмоқда.