Танаффус кутилган натижани бермади. Халқаро ўйинлар туфайли юзага келган танаффусга қадар кетма-кет саккиз ўйинда ғалаба қозона олмаган лионликлар, шу якшанба куни “Анже” билан баҳсда яна дурангга (0:0) имзо чекди. Учрашув якунида Корентен Толиссо берган интервьюсида ўз жамосидан ҳафсаласи пир бўлганини яширмади.
- Хафамиз, биз бу ерда ғалаба қозонишни жуда хоҳлагандик. Чунки билсак, агар бугун ютсак, оқшомги натижаларга кўра потенциал 3-ўринга кўтарилишимиз мумкин эди.
Ушбу омадсиз серия ҳақида нима дейишим мумкин? Бу жуда оғир, буни ҳамма кўриб турибди. Биз ёмон ҳолатга тушиб қолдик ва ўйинларда ғалаба қозониш қийин бўляпти.
Ҳозир сизга бор кучимиз билан ишлаётганимизни, аммо меҳнатимиз самара бермаётганини айтишдан бошқа гапим йўқ. Мавсум якунига қадар яна олтита ўйин қолди, жадвалнинг юқори қисмидан жой олиш учун уларнинг барчасида ғалаба қозонишимиз шарт.
Лекин бир нарса аниқ — биз таслим бўлмаймиз. Ҳали ҳаммаси тугагани йўқ, - йўқ деб фикр билдирди жамоанинг асосий ўйинчиларидан ҳисобланган Корентен Толиссо.