Ўзбекистон Профессионал футбол лигаси Ижроия қўмитаси ТерДУ клубини Пролига мусобақасидан четлаштиришга қарор қилди.
Аввалроқ жамоа кетма-кет иккита расмий учрашувда иштирок этмагани сабабли клубни мусобақадан четлаштириш масаласи Ижроия қўмитаси муҳокамасига киритилган эди.
17 октябрь куни қўмита аъзоларининг онлайн йиғилиши бўлиб ўтди. Унда етти нафар аъзо ТерДУни регламентга мувофиқ мусобақадан четлаштиришни қўллаб-қувватлади. Яна бир аъзо эса клубга мавсум якунига қадар расмий учрашувларда иштирок этиш имкониятини беришни таклиф қилди.
Йиғилишда ТерДУнинг футболчилар олдидаги молиявий мажбуриятлари ҳам муҳокама қилинди. Аввалроқ қарздорлик сабабли клубга трансфер тақиқи қўйилган эди.
Қўмита аъзолари жамоанинг кейинги учрашувларда иштирок этиши футболчилар олдидаги қарздорликни бартараф этиш учун етарли асос бўла олмаслигини таъкидлади. Шунингдек, клуб уй учрашувларини Термизда ўтказиш имкониятига эга эмаслиги, чипталар савдоси ва қўшимча ҳомийликдан тушум олиш имкониятлари чеклангани қайд этилди.
Якунда Ижроия қўмитаси аъзоларининг кўпчилик овози билан ТерДУни Про-лигадан четлаштириш ҳақида қарор қабул қилинди.
Шунингдек, Ўзбекистон U-19 чемпионатида мавсум якунига бир тур қолгани ва ТерДУ U-19 жамоасининг дастлабки тўртликка кириш имконияти йўқлиги инобатга олиниб, 21 октябрь куни ўтказилиши режалаштирилган «Хоразм U-19» — «ТерДУ U-19» учрашуви ҳам бекор қилинди.
Маълумот учун, ТерДУ клуби Лига олдидаги мажбуриятларини тўлиқ бажарган тақдирда, келаси мавсумни Биринчи лигада ўтказиш имкониятига эга