Шомуродовга “ҳужум” кучайди! Элдор фаолиятини қаерда давом эттиради?
- 22-январ 2025, 23:40
- Zohir Toshxo’jayev
- 1
- Футбол
Ўзбекистон миллий терма жамоаси ҳимоячиси Абдуқодир Ҳусановнинг “Манчестер Сити”га кўчиб ўтгани сўнгги бир неча куннинг энг долзарб масаласи сифатида жамоатчиликнинг эътибори марказида бўлди.
Табиийки, 20 ёшли легионеримизнинг дунёнинг энг мураккаб ва шиддатли лигасида гегемонлик ўрнатган “Манчестер Сити”дек қудратли клубга кўчиб ўтгани ўзбек футболининг бугунги қадар бўлган даврда энг катта ютуғи сифатида баҳоланмоқда.
Бу томонда Ўзбекистон миллий терма жамоаси сардори ва энг зўр тўпурари Элдор Шомуродов ҳам келажагига ойдинлик киритиб олиши керак. Ҳозирча, 29 ёшли ҳужумчи “Рома”да захира ўйинчиси вазифасини бажариб, айрим учрашувларда бир неча дақиқадан ўйнаб келмоқда.
Шомуродовнинг тажрибаси ҳам, маҳорати ҳам жойида. Шу боис, бу галги трансферлар ойнаси даврида ҳам бир неча клуб ўзбек футболчисини ўз сафига қўшиб олишга уринмоқда.
Қишки трансферлар даврининг ўртасига келиб, Шомуродов учун курашда “Эмполи” фаворитга айланди. Бу ҳақда Sky Sport журналисти Жанлука Ди Марцио хабар берди.
- “Эмполи” Элдор Шомуродов учун курашда олдинга чиқди ва бошқаларга нисбатан тезкор ҳаракат қилмоқда. Тажрибали ҳужумчи қидираётган тосканаликлар Элдор Шомуродовни нишонган олган. Бугунги кунга келиб ҳам клуб мутасаддилари “Рома” билан ўзбек футболчиси бўйича мулоқотларни давом эттирмоқда.
Томонлар якуний қарорга яқинлашди, “Эмполи” ўзбек футболчисини олиш бўйича дастлабки амалий қадамларини ташлади, - деб ёзмоқда Жанлука Ди Марцио.
Шомуродовга “Эмполи”дан ташқари А Сериянинг яна икки клуби – “Венеция” ва “Кальяри” ҳам даъвогарлик қилмоқда.
- “Венеция” таркибини кучайтириш бўйича иш олиб поряпти. Асосий мақсад ярим ҳимоячини кучайтириш. Ҳужум чизиғида ҳам янги ўйинчилар пайдо бўлиши кутилмоқда. Андреа Белотти, Элдор Шомуродов ва Даниэль Фила венецияликларнинг нишонидаги асосий форвардлардир.
Клуб таркибини бир неча футболчилар тарк этадиган бўлмоқда. Шу боис, “Венеця” мутасаддилари қишки трансферлар вақтида турли чизиқларга янги ижрочиларни олиб келиш ҳаракатига тушиб қолган, - деб ёзди tuttomercatoweb.com портали эксперти Даниэль Уччельери.
“Кальяри” клуби фаолиятини ёритишга катта эътибор қаратадиган La Nuova Sardegna газетаси ҳам сардинияликларнинг қишки трансфер ойнаси давридаги режалари ҳақида маълумот чиқарди.
- “Кальяри” тажрибали ҳужумчи Жанлука Лападула бўйича аниқ таклиф кутяпти. Перулик форвардга В Сериянинг бир неча клублар жиддий қизиқиш билдирмоқда.
Клуб спорт директори Нерео Бонато ҳужум чизиғини кучайтиришга икки номзодни танлаган. Асосий нишон – “Глазго Рейнжерс”да 20 та учрашувда еттита гол урган ҳуужумчи Сириэль Десерс. Лекин бу трансферни амалга ошириш жуда қийин.
Шу боис, сардинияликлар ўтган мавсумда “Кальяри” таркибида учта гол ва иккита ассистга муаллифлик қилган Элдор Шомуродовни яна жамоага қайтариш бўйича ҳам иш олиб бормоқда, - деб ёзди La Nuova Sardegna газетаси.
Қишки трансферлар ойнасининг охирига бориб, Элдор Шомуродов учун кураш янада қизийдиган бўляпти. Демак, кузатишда давом этамиз, тез орада ўзбек ҳужумчиси мавсумни қаерда давом эттириши ойдинлашади.