УЕФА Чемпионлар лигаси: Ҳусановдан бошқа вариант йўқ!

2026 йил 20 октябрь, сешанба куни «Манчестер Сити» УЕФА Чемпионлар лигаси доирасида Афина АЕК клубини «Этиҳад» стадионида қабул қилади. Энцо Мареска шогирдлари ушбу мусобақада яна ғалаба қозонишни мақсад қилган.

«Манчестер Сити»нинг Чемпионлар лигасидаги сўнгги учрашувида «Пари Сен-Жермен»га 2:4 ҳисобида мағлуб бўлганига қарамай, жамоа иккинчи бўлимда кучли ўйин намойиш этди ва ҳисобни тенглаштириш учун имкониятларга эга бўлди. Биринчи бўлимдаги омадсизлик жамоага қимматга тушди.

«Порту»га қарши сафарда 2:0 ҳисобида ғалаба қозонган «Манчестер Сити» мусобақа жадвалида ҳозирда 17-ўринни эгаллаб турибди. Жамоанинг Чемпионлар лигасидаги барча голларини норвегиялик ҳужумчи Эрлинг Ҳоланд киритган. У клуб сафида кетма-кет саккизта ўйиндан бери гол уриб келмоқда.

Ўтган дам олиш кунлари «Ипсвич Таун» «Этиҳад» стадионида меҳмон бўлди. «Манчестер Сити» ушбу учрашувда 3:2 ҳисобида ғалаба қозонди ва Премьер-лигадаги ғалабалар сериясини давом эттирди. Бу натижа Энцо Марескани Премьер-лига клуби бошқарувидаги дастлабки еттита ўйиннинг барчасида ғалаба қозонган биринчи мураббийга айлантирди.

Бироқ учрашув якунида бир қатор футболчиларнинг жароҳат олиши мумкинлиги борасида хавотирлар пайдо бўлди. Матео Ковачич, Матеус Нуньес, Нико О'Райли, Эрлинг Холанд ва Антуан Семеньо ўйиннинг сўнгги қисмида жисмоний қийинчиликларга дуч келишди.

Мареска душанба куниги матбуот анжуманида Ҳоланд ўзини яхши ҳис қилаётганини айтган бўлса-да, норвегиялик ҳужумчи кейинчалик машғулотда қатнашмади. Семеньо эса мушаклар билан боғлиқ бўлмаган жароҳати туфайли тахминан саккиз ҳафтага сафдан чиқиши кутилмоқда.

АЕКга қарши баҳс «Манчестер Сити» учун барча мусобақалар доирасида «Этиҳад»да ўтказиладиган кетма-кет учинчи учрашув бўлади. «Шаҳарликлар» Чемпионлар лигасининг кучли саккизлигидан жой олиб, кейинги босқичга тўғридан-тўғри йўлланма олиш учун ғалабага интилади.

Тахминий таркиб таҳлили

Дарвозада Жанлуижи Доннарумма майдонга тушиши кутилмоқда. У собиқ клуби «Пари Сен-Жермен»га қарши учрашувда йўл қўйган хатосидан кейин Чемпионлар лигасида ўзини қайта кўрсатиш имкониятига эга бўлади. Ўша вазиятда Магнес Аклиуш ПСЖнинг ҳисобни 4:1 кўринишига келтирган голини урган эди.

Асли марказий ҳимоячи бўлган, аммо кейинги пайтда ўнг қанот ҳимоячиси сифатида ҳаракат қилаётган Абдуқодир Ҳусанов «ПСЖ»га қарши ўйиндан кейин «Этиҳад»даги иккинчи кетма-кет учрашувни асосий таркибда бошлаши мумкин. Бу позицияда ўйнаб келаётган Матеуш  Нуньеш яна жароҳатга йўлиқди. Ўнг қанот ҳимоясида ҳозир ўзбек футболчисидан бошқа вариант йўқ. 

Бразилиялик ёш марказий ҳимоячи Витор Рейс эса сешанба куни илк бор «Манчестер Сити»нинг Чемпионлар лигасидаги ўйинини асосий таркибда бошлаши эҳтимоли бор. Мареска таркибни навбатма-навбат ўзгартириб бораётганини ҳисобга олганда, бундай қарор кутилмаган бўлмайди.

Душанба куни Афинада АЕК билан ўйин олдидан ўтказилган матбуот анжуманида Мареска билан бирга Марк Гехининг ҳам иштирок этиши унинг учрашувни асосий таркибда бошлашидан дарак бериши мумкин.

Йошко Гвардиол ҳам асосий таркибга қайтиши кутилмоқда. Бу қарор Нико О'Райлининг «Ипсвич»га қарши баҳснинг иккинчи бўлимида яна бел оғриғини ҳис қилгани билан ҳам боғлиқ бўлиши мумкин.

«Ипсвич»га қарши ўйинни захирада бошлаган Энцо Фернандес ва Эллиот Андерсоннинг АЕКга қарши асосий таркибда майдонга тушиши эҳтимоли юқори. Икки футболчи ҳам ўйин суръатини назорат қилишда муҳим роль ўйнаши мумкин.

«Ўнлик» позициясида ўйнайдиган Райан Шерки ҳам асосий таркибга қайтиши мумкин. У ўтган дам олиш кунлари «Ипсвич»га қарши учрашувни захирада ўтказган эди. Шерки жорий мавсумдаги яхши ўйинларини давом эттиришга интилади.

«Эвертон»дан ёзги трансферлар ойнасида келган Илиман Ндиайе яхши спорт формасида. У «Манчестер Сити» сафида ўнг қанот ҳужумчиси сифатида кетма-кет иккинчи учрашувни асосий таркибда бошлаши мумкин.

Эрлинг Ҳоланд одатда жамоа ҳужумининг асосий фигураси ҳисобланади. Бироқ унинг душанба куниги машғулотда қатнашмагани Фил Фоденга марказий ҳужумчи позициясида ўйнаш имкониятини бериши мумкин. Антуан Семеньонинг жароҳати ҳам бундай қарорга таъсир қилиши эҳтимолдан холи эмас.

Чап қанот ҳужумчиси позициясида эса Жереми Доку майдонга тушиши кутилмоқда. Бельгиялик футболчи ушбу позицияда ўз ўрнини мустаҳкамлаб олган.

Тахминий бошланғич таркиб:

Доннарумма; Абдуқодир Ҳусанов, Витор Рейс, Марк Гехи, Йошко Гвардиол; Эллиот Андерсон, Энцо Фернандес, Райан Шерки; Илиман Ндиайе, Фил Фоден, Жереми Доку.

Захирадагилар: Рулли, Беттинелли, Рико Льюис, Диас, Брейтуэйт, Айт-Нури, Буадди, Аллан, МакАйду, Ф. Самба.

Ўзбекистон билан ўйинга Россия терма жамоаси келади

Муҳаммад Салоҳ ва Шомуродов дуэли давом этади!

Баҳодир Жалолов жангдан кейин нега Абдуқодир Ҳусанов ва Эрлинг Холанд олдига борди?

Шомуродов голи билан рейтингга “ёриб” кирди: Туркия тўпурарлари пойгасида жиддий ўзгариш рўй берди