Серхио Рамос Мессининг юртига боришдан бош тортди

Ўтган ёз “Севилья” билан шартномаси тугаганидан бери ўзига янги жамоа қидираётган Серхио Рамосга яхши вариант чиққан эди.

Аргентинанинг энг машҳур клубларидан “Бока Хуниорс” 38 ёшли футболчини ўз сафига чорлаган эди. Бу жамоани ҳозир бир пайтлар “Реал”да Серхио Рамос билан бирга ўйнаган Фернандо Гаго бошқармоқда.

Лионель Мессининг ҳамюртлари Серхио Рамосга январдан кучга кирадиган шартнома таклиф қилди. “Бока Хуниорс” тажрибали ҳимоячи ёрдамида халқаро майдонда нуфузли совринлар учун курашишни мақсад қилган.

Лекин Серхио Рамос кутилмаганда Буэнос-Айресга боришдан бош тортди. Шу тариқа, “Бока Хуниорс” ўз сафига жаҳон чемпионини қўшиб олиш имкониятидан айрилди.