Ўзбекистон крикет федерацияси ва Афғонистон крикет кенгаши ўртасида меморандум имзоланди

Ёзги олимпия ўйинлари дастуридан ўрин олган ва спорт турлари орасида оммавийлиги жиҳатдан футболдан кейин иккинчи ўринда турувчи крикет ер юзидаги 4 миллиарддан ортиқ аҳолининг севимли спорт тури ҳисобланади.

2019 йилда ташкил этилган Ўзбекистон крикет федерацияси томонидан  қисқа фурсатда мамлакатимизда 6 та 13 ёшгача, 14 та 19 ёшгача, 4 та катталардан иборат ҳамда 9 та хотин-қизлар жамоалари ташкил  этилди.
Бундан ташқари, юртимизда турли соҳаларда меҳнат қилаётган чет эллик крикет спорт турига қизиқувчилардан иборат 2 та жамоа ташкил этилган.

Мамлакатимизнинг Тошкент шаҳри, Қашқадарё, Фарғона, Самарқанд, Тошкент, Сурхондарё, Бухоро ва Хоразм сингари вилоятларида крикет жамоалари мавжуд бўлиб, белгиланган дастурга мувофиқ, мусобақалар ўтказиб келинмоқда. 

Айни пайтда крикет бўйича эркаклар ва аёллардан иборат терма жамоалар шакллантирилиб, халқаро беллашувлар, навбатдаги ёзги олимпия ўйинларига тайёргарлик ишлари олиб борилмоқда.
Пойтахтимиздаги Миллий матбуот марказида  крикет федерациясининг  йил якунларига бағишланган матбуот анжуманида ушбу спорт турининг ривожи, унинг оммавийлигини таъминлаш, зарур инфратузилмани яхшилаш хусусида сўз борди.

Анжуманда иштирок этган Ўзбекистон крикет федерацияси раиси Азиз Михлиев, Ўзбекистон спорт вазирлиги вакиллари, Афғонистон крикет кенгаши бош котиби Насиб Хон, Афғонистон крикет кенгаши аъзоси Холид Хотам, Афғонистон крикет кенгаши бош менежери Абдул Ҳаким Раҳмани ва бошқалар журналистларнинг саволларига жавоб берди. Осиё ва халқаро крикет кенгаши билан манфаатли ҳамкорлик ўрнатилганини таъкидлаб, крикет спорт тури ривожи йўлида ўтган давр мобайнида Англия, Ҳиндистон, Покистон сингари бир нечта давлатларнинг крикет кенгашлари билан меморандумлар имзоланганини қайд этди.

Савол-жавобларга бой кечган анжуман якунида Ўзбекистон крикет федерацияси ва Афғонистон крикет кенгаши ўртасида ҳамкорлик алоқаларини мустаҳкамлаш, қўшма ўқув-машғулот йиғинларини ўтказиш, мутахассислар ўртасида тажриба алмашиш борасида ҳамкорлик меморандуми имзоланди.

Илҳом РАҲМОНОВ тайёрлади