Осиё Футбол Конфедерацияси Ижроия қўмитасининг йиғилиши бўлиб ўтди

Бугун Саудия Арабистони пойтахти Риёд шаҳрида Осиё Футбол Конфедерацияси (ОФК) Ижроия қўмитасининг 7-йиғилиши бўлиб ўтди. Унда Ўзбекистон футбол ассоциацияси биринчи вице-президенти Равшан Ирматов ҳам иштирок этди. 
 
Йиғилишга ОФК Президенти Шайх Салмон бин Иброҳим Ал-Халифа раислик қилди. Тадбирда Осиё футболининг долзарб масалалари, минтақадаги футболни янада ривожлантириш, аъзо ассоциациялар ўртасидаги ҳамкорликни мустаҳкамлаш ҳамда минтақавий ташкилотлар фаолиятини такомиллаштириш, бошқарув ва таълим дастурларини кучайтириш борасидаги янги ташаббусларни амалга ошириш бўйича муҳим қарорлар муҳокама қилинди. 
 
Шайх Салмон ўз нутқида сўнгги йилларда Осиё футболида эришилган ютуқларни эътироф этди. Шунингдек, у Конфедерация барча аъзо ассоциациялар билан бирдамликда ҳаракат қилишини, мураккаб вазиятларда уларни қўллаб-қувватлашни давом эттиришини таъкидлади. 
 
Йиғилишда ОФК ва УЕФА ўртасида мураббийлик таълими бўйича янги ҳамкорлик битимлари имзоланди. Ушбу келишувлар орқали мураббийлар малакасини ўзаро тан олиш, тажриба алмашиш ва ўқув дастурларини ривожлантириш кўзда тутилган. Битимлар 2029 йилгача амал қилади. Шунингдек “AFC Equal Pitch" дастури ҳам тасдиқланди. Бундан ташқари, Соҳил футболи бўйича навбатдаги икки Осиё кубоги Таиландда ўтказилиши белгиланди. 
 
ОФК Ижроия қўмитаси қарорига кўра, “AFC Awards 2026” маросимига ҳам Таиланд мезбонлик қилиши белгиланди.