Миржалол Қосимов: "Осилсанг баланд дорга осил"

Суперлиганинг 15-туридан ўрин олган “Машъал” – ОКМК учрашувида меҳмонлар 0:1 ҳисобида ғалаба қозонди. Ўйиндан кейин меҳмонлар устози Миржалол Қосимов матбуот анжуманида қатнашди.

- Қисқа айтадиган бўлсам, икки баробар қийин бўлди. Жамоамиздаги муаммони биласизлар. Охирги ўйинларда ғалаба қозона олмаётгандик. Йигитларни орасида руҳан тушкунлик бор эди. Иккинчи томондан об-ҳаво туфайли иккала жамоага ҳам қийин бўлди. Учинчи тарафдан “Машъал”ни яхши биламиз, тартибли ва интизомли футбол ўйнайди. Биринчи бўлим бошида 5 та ҳимоячи билан муаммо яратди. Шунга қарамасдан стандартдан гол урдик. Биринчи бўлимда ўйин тақдирини ҳал қилишимиз мумкин эди. Чунки бир қатор яхши имкониятларга эга бўлдик. Бизда вазиятлардан фойдалана олмаслик оқсаяпти. Учта имкониятдан биттасидан гол уриш керак эди. Иккинчи бўлимда кутгандик ва Асрор Алиқулов ротация қилиб, схемани ҳам ўзгартирди. Охирги вазиятда дарвозабонимиз муқаррар голдан қутқарди. Энди қисқа таътилга чиқяпмиз. Ёмон ўйин бўлмади, энг кераклиси уч очкони қўлга киритдик. Иккинчи даврага жиддий тайёргарлик кўришимиз керак. Яна эски мақомга қайтишимиз лозим. Меҳнат орқали бўлади. Иссиқ об-ҳаво бўлишига қарамай, иккала жамоа ҳам қарши ҳужумларда яхши ҳаракат қилди.

- ОКМКни ҳали ҳам чемпионлик учун асосий даъвогарлардан бири деб ҳисоблайсизми?

- Осилсанг баланд дорга осилгин деган эскиларни мақоли бор. Ҳар доим қаерда ишлашимдан қатъий назар юқори мақсад қўйилади.

- 2005 йилда “Машъал”да тўп сургансиз. Футболчилик фаолиятингизни якунлашда нега айнан “Машъал”ни танлагансиз?

- 20 йил бўлдими, шунга? Авваламбор, “Машъал”га ўша пайтда таклиф қилишган. Футболни иложи борича кўпроқ ўйнаш ниятим бор эди. Тақдир тақозоси билан 35 ёшимда тугатганман. Яхши инсонлар, шу жамоага, ўзбек футболига бефарқ бўлмаган инсонлар таклиф қилишган. 2005 йили келиб, менимча “Машъал” ҳам ўз тарихида иккинчи ўринни олган. Осиё Чемпионлар лигасида иштирок этган. Узоқроқ ўйнамоқчи эдим. Соғлигим туфайли тугатганман. Сира афсусланмайман, яна ҳаракат қилиб кўрганман, аммо бўлмаган. Муборакда уч йилча юрганман. Мураббийликка ҳам таклиф қилишган, ёшлар билан ишлашни. Ўша ерда биринчи қадамни бошлаганман. Ўзига яраша тарих ва бундан хурсандман.

- Суперлигада асосан сиз япон футболчилари билан ишлагансиз. “Бунёдкор”да Сато бор эди, ОКМКда ҳам япониялик легионерларга эътибор қаратяпсиз?

- Ҳа, “Бунёдкор”да Сато бўлган. Ўша пайтда қайсидир позицияни ёпиш учун таклиф қилганмиз. Маъқул бўлган. Уларни маданияти яхши, сира ҳам йўқ дейишмайди, айтганингизни қилишади. Кўрсатмаларни бажаришга ҳаракат қилишади. Буни ўзимиз яхши биламиз. Айнан улар эмас, ким зўр бўлса ўшаларни майдонга туширамиз. Жамоага тўғри келса у бошқа миллат вакили бўлса ҳам ёрдами тегади, футболни тили битта.

- Жарима зарбаларини ажойиб тепардингиз. Нима учун ҳозир сизга ўхшаб стандартларни қойилмақом тепадиган футболчилар чиқмаяпти?

- Аллоҳ тарафидан ҳам берилган. Лекин Худо томонидан берилган деб ўтирса ҳам иш битмайди. Буни меҳнати бор. Машғулотдан олдин ва кейин ишлаш керак, меҳр бериш лозим. Ўхшаса ҳам, ўхшамаса ҳам буни устида ишлаши даркор. Ёшлигимда мураббийлар билан ишлаганман. Россияда Гаджи Гаджиев билан бирга фаолият олиб борганман, ҳозир “Ахмат”да ишлаяпти. У билан жарима зарбалари устида кўп ишлардик. Ҳозирги тўплар билан нимадир қилса бўлмайди.