“Ковентри”ни Премьер-лигага олиб чиққан Лэмпард клубдан кетиши мумкин

Фрэнк Лэмпард бош мураббий сифатида “Ковентри” клубини 25 йиллик танаффусдан сўнг АПЛга олиб чиқди, бироқ унинг айнан шу жамоада ишлашда давом этиши аниқ эмас.

Англия матбуотида у яқинда Лиам Росеньорни ишдан бўшатган “Челси”га янги мураббий бўлиши мумкинлиги ҳақида маълумотлар тарқалмоқда.

Лэмпарднинг “Челси” учун қандай шахс эканини яна бир бор таъкидлаш ортиқча бўлса керак.

У аввал ҳам “Челси”ни бошқарган, аммо 2019-2021 йиллардаги бу тажриба унчалик муваффақиятли бўлмаган. Бироқ ўша вақтдан бери Лэмпард мураббий сифатида анча тажриба орттирди.

“Ковентри” раҳбарияти эса мураббийни жамоада сақлаб қолиш ниятини яшираётгани йўқ.

- Фрэнк бу ерда бахтли, унга шаҳар ёқади. Албатта, қандайдир фавқулодда кутилмаган таклиф бўлиши мумкин. Лекин бу ҳақда изоҳ бера олмайман. У ажойиб мураббий, - деди “Ковентри” президенти Дуг Кинг.