"ЖЧ-2026". Бразилия Гаитини йирик ҳисобда мағлуб этиб, гуруҳда пешқадамга айланди

2026 йилги Жаҳон чемпионати гуруҳ босқичи 2-туридан ўрин олган учрашувда Бразилия терма жамоаси Гаити устидан 3:0 ҳисобида ғалаба қозонди.

Филадельфия шаҳрида бўлиб ўтган баҳсда ҳисоб 24-дақиқада очилди. Матеус Кунья қайтган тўпни дарвозага йўллаб, жамоасини олдинга олиб чиқди.

36-дақиқада ҳужумчи ўз ҳисобидаги иккинчи голни ҳам киритиб, дубль муаллифига айланди.

Биринчи бўлимга қўшиб берилган вақтда эса Винисиус бирга-бир вазиятдан унумли фойдаланиб, ҳисобни 3:0 кўринишига олиб келди.

Шу тариқа, Бразилия ишончли ғалабани қўлга киритиб, гуруҳдаги ўз имкониятларини янада яхшилаб олди.