Иржи Прохазканинг октагонга қайтиш муддати маълум

Ярим оғир вазн тоифасида UFC собиқ чемпиони Иржи Прохазка жорий йил охиригача октагонга қайтиб, ТОП-5 даги рақиблар билан беллашмоқчи.

"Октябрь, ноябрь ёки декабрь ойида жанг ўтказмоқчиман. Бироқ октябрь ойи аллақачон нореал вариантга ўхшаб кўрина бошлади. Менга тўлақонли ўқув-машғулот йиғини ва тайёргарлик учун камида икки ой керак, шунинг учун, агар реал кўз билан қарасак, ноябрь ёки декабрь ойлари қолади.

Аввало, кучли бешликдан бири - чемпионликка яқин турган йигитлар билан курашмоқчиман", - деди чехиялик "Nova Sport TV" телеканалига берган интервьюсида.

Аввалроқ, Прохазка UFC тез орада унинг иштирокида вақтинчалик унвон учун жанг эълон қилиши ва у бразилиялик Пауло Костага қарши жанг ўтказиши ҳақидаги маълумотни рад этган эди.