Ҳусанов кўз ўнгида “Манчестер Сити” тарихий рекорд ўрнатди
- 27-июн 2025, 17:00
- Zohir Toshxo’jayev
- 0
- Футбол
Ҳозир бутун дунёдаги футбол жамоатчилигини нигоҳи АҚШ майдонларида ўтказилаётган янги форматдаги клублар ўртасидаги жаҳон чемпионатига қаратилган.
Футболни бутун дунё бўйича ривожлантиришга масъул ташкилот – ФИФА ушбу мусобақанинг мавқеини ошириш мақсадида бу йилдан эътиборат уни янгича усулда ташкил қилди. Нуфузли турнирда турли минтақаларнинг энг кучли 32 та клуби иштирок этаётгани футбол ишқибозларида алоҳида қизиқиш уйғотмоқда.
Ўзбекистон миллий терма жамоаси марказий ҳимоячиси Абдуқодир Ҳусанов гуруҳ босқичининг иккинчи турида Бирлашган Араб Амирликларининг “Ал-Айн” жамоасига қарши ўтказилган учрашувда 61-дақиқа ўйнаган эди.
21 ёшли легионеримиз клублар ўртасидаги жаҳон чемпионатида қатнашган ўзбекистонлик биринчи футболчи сифатида ўз номини тарихга ёздирди ва мусобақа бош ташкилотчиси ФИФА раҳбарияти йўллаган табрикни ҳам қабул қилиб олди.
Манчестерликларнинг “G” гуруҳи учинчи туридан ўрин олган Италиянинг “Ювентус” жамоасига қарши ўтказилган учрашуви жаҳон бўйлаб кўплаб мухлислар ва мутахассислар эътиборини тортди. Дастлабки иккита баҳсни ўз фойдасига ҳал қилган бу икки гранд клуб футболчиларининг ўзаро тўқнашуви гуруҳ ғолибини аниқлаб бериши керак эди.
Орландо шаҳридаги “Кемпинг Уорлд” стадионига ташриф буюрган 55 минг нафарга яқин мухлис сермаҳсул ўйин томоша қилди. Дарвозаларга еттита гол урилган баҳсда “шаҳарликлар” 5:2 ҳисобида зафар қучди.
Айнан ҳисобнинг йириклиги манчестерликларга тарихий натижа олиб келди. Чунки “шаҳарликлар” шу пайтгача Турин суперклуби билан етти маротаба тўқнаш келиб, бирор марта рақиб дарвозасига биттадан кўп тўп кирита олмаган эди.
Абдуқодир Ҳусанов захира ўриндиғидан кузатиб борган беллашувда “Манчестер Сити” илк бор “Ювентус” дарвозасини беш бор ишғол қилди ва айни пайтда А Серия вакилидан ҳар томонлама устун эканини намойиш қилди.
Статистик билан шуғулланадиган манбаларда “Манчестер Сити” ва “Ювентус” ўзаро учрашувларда қандай натижалар қайд этгани кўрсатилган маълумотлар тарқатилмоқда. Sports.uz портали ушбу кўрсаткичларни ўзбекистонлик футбол ишқибозлари эътиборига ҳавола этади.
15.09.1976 йил, УЕФА кубоги 1/32 финал
“Манчестер Сити” – “Ювентус” 1:0.
29.09.1976 йил, УЕФА кубоги 1/32 финал
“Ювентус” – “Манчестер Сити” 2:0.
30.09.2010 йил, Европа лигаси, “А” гуруҳи
“Манчестер Сити” – “Ювентус” 1:1.
16.12.2010 йил, Европа лигаси, “А” гуруҳи
“Ювентус” – “Манчестер Сити” 1:1.
15.09.2015 йил, УЕФА Чемпионлар лигаси, “D” гуруҳи
“Манчестер Сити” – “Ювентус” 1:2.
25.11.2015 йил, УЕФА Чемпионлар лигаси, “D” гуруҳи
“Ювентус” – “Манчестер Сити” 1:0.
11.12.2024 йил, УЕФА Чемпионлар лигаси, Умумий босқич
“Ювентус” – “Манчестер Сити” 2:0.
26.06.2025 йил, клублар ўртасидаги жаҳон чемпионати, “G” гуруҳи
“Ювентус” – “Манчестер Сити” 2:5.
Статистик маълумотлардан кўриниб турибдики, бу икки буюк клубнинг ўзаро тўқнашувларида устунлик туринликлар томонида. Манчестерликлар жами саккизта учрашувдан дастлабкиси ва охиргисида зафар қучгае ва ўртада икки бор дуранг ўйнаган.
“Манчестер Сити” мухлислари жамоанинг “Ювентус” устидан ғалаба қозонишини қарийб ярим аср кутди.
Клублар ўртасидаги жаҳон чемпионатининг “G” гуруҳи якунларига кўра, кетма-кет учта учрашувда зафар қучган Хосеп Гвардиола шогирдлари плей-оффда “Н” квартетини иккинчи поғонада якунлаган Саудия Арабистонининг “Ал-Ҳилол” жамоасига қарши ўтказади.
“Ювентус”ни эса яна бир қийин учрашув кутиб турибди. Туринлар мусобақани давом эттириш учун нимчорак финалда Мадриднинг “Реал” жамоаси тўсиғидан ўтиши талаб этилади.
Машҳур клуб Шомуродов трансферини кутмоқда
Файзуллаевга янги мавсум учун иккита вариант “таклиф” қилишди!