Файзуллаевнинг эндиликда собиқ жамоадоши тарихга кирди

Россия Премьер-лигасининг иккинчи турида Аббосбек Файзуллаевнинг эндиликда собиқ клуби ЦСКА ўз майдонида “Ахмат” клубини 2:1 ҳисобида мағлубиятга учратди.

“Армиячилар” дарвозасини қўриқлаган Игорь Акинфеев профессионал фаолияти давомида ЦСКА таркибида 800-учрашувини ўтказди. Маҳоратли голкипер шу учрашувлардан 334 тасида ўз дарвозаси дахсизлигини сақлаб қолган ва жами 718 та тўп ўтказиб юборган.

Бу жаҳон футболида бир жамоа учун энг кўп ўйин ўтказган футболчилар рейтингида 14-натижа сифатида қайд этилди.

Умумий рейтингда биринчи ўринни бразилиялик голгипер Рожерио Сени эгаллаб турибди. Тўпурарлик маҳорати билан ҳам машҳур бўлган бу дарвозабон “Сан-Паулу” сафида 1105 та ўйинда майдонга тушган.

Қолган ҳеч бир футболчининг бир жамоа учун ўтказган учрашувлари сони мингтага етмаган. Сенининг энг яқин таъқибчиси Райан Гиггз “Манчестер Юнайтед” учун 963 та ўйинда иштирок этган.

Учинчи натижа эгаси ҳисобланган Паоло Мальдини ҳисобида “Милан” таркибида 902 та ўйин бор. Шунингдек, бразилиялик Адемир ҳам “Палмейрас” либосида 902 та беллашувда майдонга тушган.