Элдорни нималар кутмоқда? Шомуродовга оид сўнгги янгиликлар

Италия А Серияси 14-турининг марказий учрашувларидан бири пойтахтдаги “Олимпико” стадионида бўлиб ўтади.

Тўпуланиб қолган муаммоларини ҳал қилишга уринаётган “Рома” ўз мухлислари кўз ўнгида чемпионлик учун курашаётган “Аталанта”ни қабул қилади.

Ушбу учрашув олдидан “бўрилар” бош мураббийи Клаудио Раньери бир нечта яхши хабар эшитди ва баҳс олдида кайфияти жуда яхши.

Гап шундаки, жароҳат, касаллик ва турли бошқа сабабларга кўра, сафдан чиққан ҳужумкор футболчилар яна машғулотларга қайтди ва бўлажак ўйинда майдонга тушиб, тўп тепишга тайёр.

Таниқли инсайдер Жанлука ди Марцио Элдор Шомуродов ҳақида алоҳида тўхталиб, ўзбек легионери мушакдаги жароҳатидан тўлиқ тиклангани, умумий гуруҳ машғулотларида интенсив шуғуллангани, Клаудио Раньери уни яхши кутиб олиб, ўйин қайдномасига киритгани ҳақида ёзди.

Бундан ташқари, римликларнинг энг таниқли юлдузи Пауло Дибала ҳамда Алексис Салимаркс саломатлигини тўлиқ тиклаб мураббийлар штаби ихтиёрига қайтди. Улар ҳам худди Шомуродов каби жамоа машғулотларида анча тер тўкди.

Раньери олдида турган асосий муаммо ҳимоя чизиғи бўлиб турибди. Марио Эрмосо жароҳат туфайли таркибда эмас ва “Аталанта” қарши баҳсда пойтахтликларга ёрдам бера олмайди. Испаниялик футболчининг сафга қачон қайтиши номаълумлигича қолмоқда.

Умуман олганда, Клаудио Раньери ўйин қайдномасига қуйидаги футболчиларни киритди.

Таъкидлаш жоизки, Элдор Шомуродов олдида ўзининг жамоага кераклигини исботлаш вазифаси турибди. Аслида ҳамюртимиз ёзги трансфер ойнаси ёпилиши арафасида бошқа клубга ўтиши кутилган эди.

Лекин ўша пайтдаги “Рома” бош мураббийи Даниэле Де Росси ҳамюртимизнинг машғулотлардаги фаоллиги ва “Эмполи”га қарши учрашувдаги ўйинини кўриб, уни жамоада олиб қолишга қарор қилганди.

Бироқ тез орада Даниэле Де Росси истеъфога чиқарилди, унинг ўрнига келган хорватиялик мураббий Иван Юрич Элдор Шомуродовга етарли ўйин амалиёти бермади. Бу мутахассиснинг пойтахтдаги саргузашти икки ойда поёнига етди.

Энди “Рома” тажрибали устоз Клаудио Раньери қўл остига ўтди. Римлик мураббий Элдор Шомуродовни яхши билади. Улар ўтган мавсум биргаликда “Кальяри”ни юқори дивизионда олиб қолди.

Шунга қарамай, Элдор “Рома” раҳбариятига жамоа учун керакли ўйинчи эканини яна бир карра намойиш қилиши лозим. Чунки мутасаддилар Элдор Шомуродовни бошқа жамоага ўтказиб юборишни режалаштирмоқда.

Бир неча манбалар, хусусан, romaforever.it портали эксперти Лука Мугнайолининг маълум қилишича, “Рома” спорт директори Гисольфи “Барселона”дан кетиш пайида юрган Ансу Фатини олиб келиш бўйича иш бошлаган.

- Қишки трансферлар даврида Гисольфи марказий ҳужумчи Артём Довбикка ўринбосар топиши энг долзарб масалага айланди. “Мессининг вориси” сифатида танилган Ансу Фати Элдор Шомуродов ўрнини эгаллаши кутилмоқда.

“Барселона”дан кетиш пайида юрган Ансу Фати универсаллиги билан Раньерига қўл келиши мумкин. Истеъдодли ўйинчи нафақат марказий ҳужумчи ўрнида, балки олдинги чизиқнинг бошқа позицияларида ҳам ўйнай олади. Бундан ташқари, зарур пайтда ярим ҳимоя ва мудофаага ҳам кўмаклашади, - деб ёзди Лука Мугнайоли.

Бундан келиб чиқиб, кўп нарса Элдор Шомуродовнинг қолган ўйинларда ўзини қай даражада кўрсатишига боғлиқ бўлади. Клаудио Раньери эса, ўзбек ҳужумчисининг имкониятларини яхши билгани учун аввалги мураббийларга нисбатан кўпроқ ўйин амалиёти бериши кутилмоқда.

Ҳусанов “тахт”ни топширди, лекин...

“Ланс” мухлислари Ҳусановнинг суперклубга трансферига қандай муносабат билдиряпти?

Файзуллаев трансферида “тўйдан олдин ноғора қоқмайлик”!

Файзуллаев, Испанияни танла!

Катта пул керак: Ҳусанов “Ланс”ни қутқарадими?

“Рома”: Аргентиналик юлдуз Шомуродовдан зўр эмас!