"Хоразм"ни мавсум бошидаёқ жиддий жамоа эканлигини билгандик" - "Қизилқум" устози 0:3 ҳисобидаги мағлубиятга яна қандай изоҳ берди?

Суперлигада 4-турнинг қолдирилган "Қизилқум" - "Хоразм" қарама-қаршилигида меҳмонлар Навоийда жавобсиз учта гол урган ҳолда ишончли ғалабани қўлга киритдилар. Албатта, кўпчилик "Қизилқум"нинг ўз уйида 0:3 ҳисобида имкониятни бой беришини кутишмаганди. "Қизилқум" мухлислари кутган ўйинни намойиш қила олмади. Клуб матбуот хизмати эса ўйиндан кейин бош мураббий Никола Лазаревичнинг мағлубият сабаблари ҳақидаги фикрларини тақдим этди.

"Биринчи навбатда Қурбон ҳайит байрами ва Ўзбекистон терма жамоасининг жаҳон чемпионатининг финал босқичига йўлланмани қўлга киритгани билан барча ўзбекистонликларни чин қалбимдан табриклайман.

Ўйин ҳақида гапирадиган бўлсам, биз мавсум бошида “Хоразм” билан назорат учрашувида ҳам куч синашгандик ва ўшандаёқ бу жиддий жамоа эканлигини билгандик. Ортда қолган 10 та турда ҳам жамоа дадил одимлаётганига гувоҳ бўлдик. Бизга қийин бўлишини билардик ва рақибдан бугунгидек ўйин кутгандик. 

Биринчи бўлимда рақибга марказда эркин ҳаракат қилишига имкон бермасликка интилдик. Бироқ бу вазифани бажаришда катта қийинчиликка дуч келдик. Айрим вазиятларда футболчилар бир-бирини тушунишмади. Биринчи гол ўтказилган ҳудудда рақиб футболчисини “ёпиш”га таянч ярим ҳимоячиларимиз улгуришмади. Афсуски айнан шу ҳудуддан бу мавсумда ўз дарвозамиздан кўплаб голлар ўтказяпмиз. Ўйиндан кейин шу каби вазиятларни футболчилар билан таҳлил қиляпмиз. Аммо негадир яна ва яна шу “зона”дан голлар ўтказяпмиз. 11 турга келиб 22 та тўп ўтказишимиз уятли ҳолат, албатта. 

Иккинчи бўлимда ташаббусни ўз қўлимизга олишга ҳаракат қилдик ва режамизни бироз ўзгартирдик.  Натижада иккинчи бўлимда гол уриш учун кўпроқ имкониятлар ярата олдик. Рақиб жарима майдончаси олдида хавфли вазиятлар ташкил этдик. Аммо якуний нуқтани қўйишга рақиб футболчилари имкон беришмади", - дейди Лазаревич.

"Қизилқум" жамоаси навбатдаги баҳсини 12-тур доирасида 14 июнь санасида ўз майдонида "Сўғдиёна"га қарши ўтказади.