Шавкат Саломов: "Финалда ютқазган бўлсак-да, мукофот пуллари берилди"

29 октябрь куни Андижондаги “Бобур арена”да бўлиб ўтган Ўзбекистон Кубоги финалида “Пахтакор” “Бухоро”ни 1:0 ҳисобида мағлуб этиб, бош совринни қўлга киритди.

Ўйин охирларида бухороликларнинг голи ҳисобга олинмади ва ҳакамнинг қарорлари баҳс-мунозараларга сабаб бўлди.

Sports.uz журналисти “Бухоро” бош директори Шавкат Саломовдан Кубок финалидаги ўйин бўйича интервью олди.

- Кубок финалидаги ўйин борасидаги таассуротларингиз қандай?

- Дастлабки 10-15 дақиқасини ҳисобга олмаганда яхши ўйин бўлди. 15 дақиқадан кейин футболчилар умуман бошқа футбол кўрсатдилар. Жамоамиз кундан-кунга яхши ўйин намойиш қилаётганидан хурсандман. Биз деярди Ўзбекистон терма жамоасига қарши ўйнадик. Уларни захирасида ҳам ҳатто терма жамоа ўйинчилари бор. Ўйинчиларимиз қилган меҳнатлари учун катта раҳмат. Раҳбарият “Бухоро” клубини ҳар томонлама қўллаяпти ва бизни муаммоимиз йўқ. Ҳеч қандай қарзимиз ҳам йўқ. Вилоятимиз ҳокими Ботир Комилович Зариповга алоҳида раҳмат. Кубок финалидан олдин ўзлари қўнғироқ қилиб футболчиларга омад тилаб, руҳлантирди. Ютқазган бўлсак ҳам мукофот пулларини бердилар. Шу ўринда раҳбарларимизга - вице-президентимизга, шунингдек, Акбар Алишерович ва Бахтиёр Алишеровичга ҳам катта раҳмат. Улар жамоамизни қўллаб-қувватламоқдалар. Биз ўйин бўйича умуман ютқазмадик. Жамоамиз асосан битта таркиб билан ўйнамоқда. Александр Хомяков ҳам раҳмат. Оғир вазиятда бўлса-да, жамоани қабул қилиб олди. Мураббий жамоани мен йиғмаганман, униси кучли ёки кучсиз деб айтгани йўқ. Кўп мураббийларни кўрганман. Аксарияти жамоани қабул қилиб олгач, натижа ўхашмаса бу клубни мен тўплаганим йўқ дейишади. Хомяков эса бу борада бир оғиз ҳам индагани йўқ.

- “Бухоро”нинг голи ҳисобга олинмаган вазиятга нима дея оласиз?

- Нима дейишни ҳам билмайман. Ўша вазиятни кўриш учун 7 дақиқа вақт кетди, бу жуда кўп. Рақиб ўйинчисини қўполлиги учун мени фикримча, 100 фоизли қизил карточка  эди. Ўзбекистон Кубоги финалини унга ишониб топширишган. У бош ҳакам, адолатли ишлаши керак. Қизил карточкали вазиятни 3 дақиқадан кўпроқ кўрди, гол урилган ҳолатни эса 7 дақиқа кўрди. “Бухоро” тарихга кириши керак эди. Ҳакамлар ишини назорат қиладиган экспертлари бор. Биз финалга муносиб равишда чиқдик ва ҳал қилувчи учрашувда ҳам муносиб ўйнадик.  

- Ўйиндан кейин ҳакам устидан шикоят аризаси ёзмадингларми?

- Йўқ, ёзмадик. Мухлисларимизга катта раҳмат. Улар шунча йўл босиб келиб тинмай қўллаб-қувватлашди.

- Асосий эътибор яна чемпионатга қаратилади. “Бухоро”ни Суперлигадаги ҳолати у қадар яхши эмас. Кубок финаладига мағлубият руҳий тарафдан таъсир қилмасмикин?

- Футболчилар профессионал бўлиши керак. Бу - футбол. Уларни иши майдонга чиқиб тўп суриш. Ютқазадими-ютадими, ҳамиша ўз ишига профессионал ёндашиш керак. Чемпионат ўйинига таъсир қилмаслиги керак. Барибир истаймизми-йўқми, қанча асаб, энергия кетди, жахл чиқди, ўзига яраша таъсир қилиши мумкин. Жароҳат олса тезроқ тузалиши мумкин, бироқ руҳий томонлама тузатиш қийин, вақт керак. Биз ўйинчиларимизга ишонамиз. Улар охиригача курашишади. Муҳими, финални унутишимиз лозим. Қанча тез унутсак шунча яхши.