Шерзод Жўраев: "Бундай ўйин билан мухлисларни хурсанд қила олмаймиз"

Суперлиганинг 26-туридан ўрин олган “Қўқон-1912” - “Навбаҳор” (2:0) учрашувидан сўнг меҳмонлар бош мураббийи Шерзод Жўраев матбуот анжуманида иштирок этди.

- Томошабоп ўйин бўлди, деб ўйлайман. Намангандан кўп мухлислар келди. Уларни хурсанд қилиш мақсадида майдонга тушгандик. Учрашув бошларида қизил карточка олишимиздан қатъий назар ҳужумкор ўйин кўрсатишимиз керак эди. Ҳамма йигитлар шунга ҳаракат қилди. Барибир майдонда 10 киши қолганимиз охирида таъсирини қилди. Хатоларимиз туфайли голлар ўтказиб юбордик.

- Кейинги турда “Навбаҳор”ни “Насаф”га қарши қизиқарли ўйин кутяпти. Жамоангизни “Насаф”дан очко олишга кучи етадими?

- Келганимиздан бери футболчилар билан гаплашиб турибмиз. Уларни нималарга қодирлигини ва бундан ҳам кучлироқ футбол кўрсата олишларини таъкидлаб келяпмиз. Худо хоҳласа, шунга ҳаракат қиламиз. Қолган учрашувларда ҳам бор кучларини ишга солишади. Ишқибозларимизни хурсанд қилишимиз керак. Бундай ўйин билан хурсанд қила олмаймиз. Чунки ҳамма жамоа учун ҳаракат қилиши лозим. Ўйинни таҳлил қиламиз, кўриб чиқиб, хулоса қилиб, бир қарорга келамиз.