Рэшфорд ёзда АПЛнинг бошқа бир топ клубига ўтиши мумкин

27 ёшли Маркус Рэшфорд январда "Астон Вилла"га ижарага ўтганидан бери жуда яхши ўйин кўрсатмоқда. Унаи Эмери жамоаси ёзда уни 46,6 миллион евро (40 миллион фунт) эвазига тўлиқ сотиб олиш имкониятига эга.

Шу билан бирга, "FootballTransfers" манбасининг маълум қилишича, "Тоттенхэм" ҳам Рэшфорднинг вазиятини диққат билан кузатмоқда. Қишда улар футболчини сотиб олишдан воз кечганди.

Манбага кўра, январь ойида "шпорлар" "Манчестер Юнайтед" яримҳимоячисини олишга қизиқиш билдирган, бироқ бош мураббий Энже Постекоглу ўша пайтда "Бавария"нинг ёш истеъдоди Матис Телни қисқа муддатли ижара асосида олишни маъқул кўрган.

Шунга қарамай, агар "Астон Вилла" ёзда Рэшфордни доимий равишда сотиб олишдан бош тортса, "Тоттенхэм" футболчига қизиқишни қайта тиклаши мумкин.

Шунингдек, "Манчестер Сити"да келажаги ноаниқ бўлган Жек Грилиш ҳам "Тоттенхэм" раҳбарияти диққат марказида. Шу билан бирга, "Саутгемптон"нинг ёш истеъдоди Тайлер Диблинг ҳам жамоа томонидан ўнг қанот учун номзод сифатида кўрилмоқда.