Рэшфорд “Манчестер Юнайтед”га “бош оғриқ” бўляпти

“Манчестер Юнайтед” тарбияланувчиси Маркуч Рэшфорд сэр Алекс Фергюсон башорат қилганидек клуб тарихидаги энг зўр футболчи мақомига кўтарила олмади.

Бир неча мавсумдан бери тажрибали ҳужумчи юқори даражага чиқа олмаяпти. Унга барқарорлик етишмаяпти.

Рубен Аморим жамоани қайта шакллантириш вазифасини олган. Португалиялик мутахассис Рэшфордни ўзи суянадиган ўйинчилар қаторига киритмади. Клуб қимматбаҳо юлдузни сотиб юборишга қарор қилган.

The Telegraph нашрининг ёзишича, ҳозирча клуб 27 ёшли ҳужумчи бўйича бирор жиддий таклиф олгани йўқ. Бунга Маркуснинг маоши катталиги сабаб экани айтилмоқда. Рэшфорд клуб билан шартномани 2028 йилнинг ярмигача узайтирганида маоши ҳафтасига 325 минг фунт қилиб белгиланган.

Лекин бугунги кунда Маркус кўрсатаётган ўйин олаётган маошига арзимайди. Қолаверса, Европа миллий лигаларида Англия Премьер-лигаси жамоаларичалик катта маошни кўтара оладиган клублар кўп эмас.