"Real" "Manchester Siti" yulduzini sotib olmoqchi

"Real" "Manchester Siti"dan Rodrini o‘z safiga qo‘shib olish haqida o‘ylamoqda.

Madrid klubi katta obro‘ga ega va dastlabki daqiqalardanoq o‘zini ko‘rsata oladigan tajribali futbolchiga qiziqish bildirmoqda, deb yozmoqda AS nashri. Shu munosabat bilan klub o‘tgan mavsumda xochsimon jarohat olib, 9 oyni o‘tkazib yuborgan Rodri bilan bog‘liq vaziyatni kuzatib bormoqda.

"Oltin to‘p" sohibining APL klubi bilan shartnomasi 2027 yilda yakuniga etadi va hozircha uzaytirilmagan. Qayd etilishicha, vaziyatning rivojlanishi 29 yoshli xavbekning jarohatidan so‘ng qanday sport formasini namoyish etishiga bog‘liq bo‘ladi. "Real"ning taxminicha, agar futbolchi shartnomani kelasi yozgacha uzaytirmasa va "Siti"ni tark etishni istasa, klub uni arzon narxda sotishga majbur bo‘ladi.

Shu bilan birga, "qaymoqranglilar" yozda yana bir yirik xarid uchun moliyaviy imkoniyatlarga ega. Ayniqsa, Rodrigo ketsa, uning transferi jamoaga 80-100 mln evro atrofida foyda keltirishi mumkin.

Rodridan tashqari yana bir nechta yarim himoyachilar ham ko‘rib chiqilmoqda. Ular orasida: Nikolo Barella ("Inter"), Entso Fernandes ("Chelsi") va Aleksis Makallister ("Liverpul"). Biroq, bu futbolchilarning barchasi uzoq muddatli shartnomalarga ega va ular o‘z jamoalarida muhim rol o‘ynaydi. Shuning uchun ularni xarid qiyinroq bo‘ladi, deb hisoblanmoqda.