Postekoglu: "O‘yinda to‘liq ustunlik qildik, ammo bu yana bir kechirib bo‘lmas mag‘lubiyat bo‘ldi"

"Tottenxem" bosh murabbiyi Postekoglu APLning 33-turidan o‘rin olgan "Nottingem Forest"ga qarshi o‘yindan (1:2) so‘ng o‘z fikrlarini bildirdi. Mazkur mag‘lubiyat bilan jamoa APLdagi mag‘lubiyatlar sonini 18 taga etkazib, 2003/04 yilgi mavsumdan beri birinchi marta bunday natija qayd etdi.

– Bu yana bir o‘yin bo‘ldiki, unda yutqazdik, garchi bu shunchalik ham bo‘lishi shart emas edi.

Mavsum davomida muhim pallalarda o‘zimizga muammolar yaratib kelyapmiz – bu esa diqqatning etishmasligi bilan bog‘liq. Biz juda oson gollar o‘tkazib yubormoqdamiz.

Bu alamli, chunki jamoam ajoyib futbol namoyish etdi. Biz maydonda to‘liq ustunlik qildik. Lekin bu yana bir kechirib bo‘lmas mag‘lubiyat.

Men muxlislarga hech narsa demoqchi emasman. Juda ko‘p mag‘lubiyatlar. Ular bizdan mamnun emasligini tushunaman.

Lekin men ham mamnun emasman, futbolchilar ham. Biz o‘z standartlarimizni oqlamaganimiz uchun javobgarlikni o‘z zimmamizga olishimiz kerak, – dedi "shporlar" mutaxassisi.