Кунде Ямал ва Дембеле "Олтин тўп"га даъвогарлиги ҳақида гапирди

"Барселона" ҳамда Франция терма жамоаси футболчиси Жьюл Кунде Усмон Дембеле ҳам, Ламин Ямал ҳам "Олтин тўп"га лойиқ деб ҳисобламоқда.

"Мен буни аввал ҳам айтганман ва яна бир бор такрорлайман. Иккаласи ҳам бунга лойиқ. Улар ажойиб мавсум ўтказишди, бунинг устига совринлар билан. Иккаласини ҳам жамоадоши сифатида танлаш осон эмас.

Мен овоз берадиганлардан эмасман, иккаласини ҳам ёқлайдиган аргументлар бор. Мен Ламин билан ўйнашдан, унинг бизга қандай ёрдам бераётганини кўришдан бахтиёрман. Усмон, айтиш мумкинки, чўққига чиқди ва статистик маълумотларга кўра, ўзининг энг яхши футболини кўрсатмоқда. Энг кучлиси ғалаба қозонсин", - деди "Барселона" ва Франция терма жамоаси ҳимоячиси.

"Олтин тўп"ни топшириш маросими 22 сентябрь куни Парижда бўлиб ўтади.