Кукурелья: "Англиялик футболчилар ҳам "Реал" ва "Барса"га интилишади"

"Челси" ва Испания терма жамоаси ҳимоячиси Марк Кукурелья "Реал Мадрид" ҳамда "Барселона"нинг жаҳон миқёсидаги обрўси ҳақида фикр билдирди.

"Англияга биринчи бор келиб, "Брайтон" сафида ўйнаганимда ҳайрон қолганман – бу ердаги футболчилар "Арсенал" ёки "Челси" эмас, айнан "Реал Мадрид" ёки "Барселона"да тўп суришни орзу қилишарди. Ана ўшанда "Реал" ва "Барса"нинг жаҳон бўйлаб қандай нуфузга эгалигини тушунганман", – дейди Кукурелья AS нашрига.

Унинг сўзларига кўра, Ла Лига гранди АПЛ клубларига нисбатан катта шартномалар таклиф қила олмаслиги мумкин, аммо уларнинг тарихи ва обрўси сабаб кўплаб кучли футболчиларни ўз сафига жалб эта олади.

Эслатиб ўтамиз, Кукурелья футболчилик фаолиятини "Эспаньол" ва "Барселона" тарбияланувчиси сифатида бошлаган. У "Барса"нинг асосий таркибида фақат 1 та ўйинда майдонга тушган. Кейинчалик "Эйбар" ва "Хетафе"да тўп сурган, 3 йил муқаддам эса "Челси" сафига қўшилган эди.