Индзаги: "Биз “Барселона”ни ҳурмат қиламиз, лекин қўрқмаймиз"

"Интер" бош мураббийи Симоне Индзаги Чемпионлар лигаси ярим финали олдидан "Барселона"га қарши ўйин бўйича ўз фикрларини билдирди.

– Жамоам ўтган ҳафтада идеал ўйнамади, лекин охирги тўрт йилда бажарган ишимиз буюк. Айримлар ҳатто А Сериядаги тўртликка киришимизни имконсиз деб ҳисоблашганди. Шунинг учун футболчиларим ва мухлисларим ҳақида ҳеч қачон ёмон гап айтмайман. Биз улар билан биргаликда мўъжиза яратдик.

– "Барса"ни яхши биламиз. Флик – жуда яхши мураббий ва у жамоани жуда яхши ташкил қилган. Уларнинг ҳужумкор футболчилари зўр ва мўъжаз ўйин намоён этишади. Бу жамоа вақт ўтиши билан шаклланган ва кўплаб тарбияланувчиларга эга. Улар икки титулни қўлга киритишди ва яна иккитаси учун курашмоқда.

Биз уларни ҳурмат қиламиз, лекин қўрқмаймиз. Бу "Барселона"га ҳам, "Бавария", "Реал", "Манчестер Сити", "Арсенал"га ҳам тааллуқли. Ушбу турнирда уларнинг барчаси кучли рақиблар. Биз эса ярим финалда ҳақиқий "Интер"ни кўрсатмоқчимиз.

– Охирги ҳафтада "Барса" кубокни ютди, сизлар эса муваффақиятсиз серияга учрадингиз. Бу кайфиятда фарқ яратадими?

– Балки кайфиятда фарқ бордир, лекин ўйинда ҳаммасини кўрсатиш мумкин. Менимча, улар Европанинг тўрт кучли жамоасидан бири. Бу сатрга "Арсенал" ва ПСЖ ҳам киритилади, - дея ўз фикрларини билдириб ўтди "нераззурилар" мураббийи.