Ҳозирда Неймар А Серия клубида ўйнаётган бўлиши мумкин эди

Италиянинг "Наполи" клуби 2025 йилнинг январь — май ойларида Неймарни ўз сафига қўшиб олиш имкониятини кўриб чиққан. Бу ҳақда "La Gazzetta dello Sport" нашри хабар берди.

Манбага кўра, клуб президенти Аурелио Де Лаурентис ва бош мураббий Антонио Конте бразилиялик футболчининг трансфери жамоа ўйини ҳамда мухлислар орасидаги қизиқишга қандай таъсир кўрсатишини батафсил таҳлил қилган.

Шунга қарамай, бу режа амалга ошмай қолган. Бунга асосий сабаб сифатида жамоа ичидаги мувозанатни сақлаш ва чемпионликдан сўнг бирдамликни йўқотмаслик зарурати кўрсатилган.

Маълумот учун, 33 ёшли ҳужумчи 2025 йил бошидан бери Бразилиянинг "Сантос" жамоаси шарафини ҳимоя қилиб келмоқда. "Transfermarkt" портали маълумотига кўра, унинг ҳозирги трансфер қиймати 11 миллион еврони ташкил этади.