ФИФА Ҳусанов учун “Манчестер Сити”га катта сумма тўлайди!

Футбол катта бизнесга айланиб кетганига анча бўлди. Жаҳон чемпионати футбол оламининг энг нуфузли мусобақаси ҳисоблансада, ушбу турнирнинг бош ташкилотчиси бўлган ФИФА ўйинчиларга эгалик қилувчи клублар билан ҳисоблашишга мажбур.

2026 йили бўладиган мундиалга бирданига уч мамлакат – АҚШ, Канада ва Мексика мезбонлик қилади. Айни пайтда жаҳон чемпионатида қатнашадиган ўнта терма жамоанинг номи маълум бўлиб улгурди. Улар орасида Ўзбекистон миллий терма жамоаси борлиги ҳамма учун ҳақиқий сюрприз.

Турли минтақаларда тўрт йилликнинг энг нуфузли чемпионатида иштирок этиш учун кураш қизғин кечмоқда. Ўз навбатида, ФИФА ҳам мусобақани юқори савияда ўтишини таъминлаш учун турли чора-тадбирлар ишлаб чиқмоқда.

Сўнгги маълумотларга қараганда, жаҳон футболини бошқариб турган ушбу халқаро ташкилот 2026 йилги жаҳон чемпионатига ўз футболчиларини юборадиган клублар учун тўлов ажратишга қарор қилди. Ҳозирча, бу сумма умумий тарзда камида 209 миллион доллар бўлиши кутилмоқда.

Ўзбекистон миллий терма жамоаси ўз тарихида илк бор жаҳон чемпионатида иштирок этади. Бу мусобақага жалб қилинадиган футболчиларимизнинг клублари, уларни тарбиялашда иштирок этган жамоалар ҳар бир ўйинчи ортидан ФИФАдан улуш олади.

Ўзбек футболчилари мусобақада қанча узоқ қолса, жамоалар шунча кўп пул ишлай бошлайди. Бу тўловлар ўйинчилар охирги бир неча йил давомида ўйнаган клубларга ҳам берилади.

Масалан, Ўзбекистон миллий терма жамоасининг июнь ойидаги йиғинларига “Пахтакор”дан тўрт футболчи таклиф этилди. Агар улар 2026 йилги жаҳон чемпионатининг якуний қайдномасидан жой олса, уларнинг ҳар бири учун ФИФА клубларга кунлик тўловни амалга оширади. Бу тўлов 10 минг долларгача бўлиши мумкинлиги айтилмоқда.

Масалан, Абдуқодир Ҳусановнинг жаҳон чемпионатида иштирок этиш эҳтимоли жуда юқори. 21 ёшли ҳимоячининг профессионал фаолиятини йўлга қўйишда катта хизмат қилган Беларуснинг “Энергетик-БГУ” клуби ҳам маълум миқдорда пул олади. Аммо ФИФА ўзбек футболчисининг мундиалда иштирок этган кунларидан келиб чиқиб, легионеримизнинг трансфер ҳуқуқига эгалик қилувчи “Манчестер Сити”га тўлайдиган суммаси бир неча юз минг долларга етиши мумкин.

Худди шундай, “Рома” ҳам Элдор Шомуродовнинг жаҳон чемпионатида иштирок этиши орқали халқаро ташкилотдан улуш олиб туради.

Шунингдек, Ўзбекистон миллий терма жамоасига жалб қилинадиган барча футболчиларнинг клублари, уларнинг шаклланишида иштирок этган жамоалар ҳам белгиланган тартибда пул ишлаб оладиган бўляпти.

Манбаларнинг таъкидлашича, терма жамоалар уммонортидаги мундиалда қанча узоқ қолса, мусобақага футболчи жўнатган клуб ва миллий федерацияларнинг ғазнаси шунча бойиб боради.

Гвардиола футбол тарихидаги энг зўр мураббий номини айтди

“Манчестер Сити”ни 2016 йилдан бери бошқариб келаётган Хосеп Гвардиола жаҳон футболи тарихида ўзи энг зўр, деб билган мураббий номини айтди.

- Сэр Алекс Фергюсон – футбол тарихидаги биринчи рақамли мураббий. У футболда амалга оширган ўзгаришлар ва динамикани таъминлашда ҳам биринчи бўлган, - деди испаниялик мутахассис ўз ҳамкасби ҳақида.

Сэр Алекс Фергюсон – жаҳон футболида энг муваффақиятли мураббийлардан ҳисобланади. “Манчестер Юнайтед”ни 1986 йилдан 2013 йилга қадар бошқарган.

Унинг қўл остида “Олд Траффорд” эгалари 13 маротаба Англия чемпионлигига, беш бор Англияга кубогига, икки марта Европа Чемпионлар лигаси бош совринига эга чиққан.

Фергюсон мураббийлик даврида охиригача курашадиган жамоа шакллантириш, ўйинчиларда иштиёқ уйҳотиш ва футболдаги янгилик ҳамда ўзгаришларга тез мослаша олиши билан ном қозонган.

Легионеримиз Европада юриш қилишга тайёр!

Файзуллаевни йўқотмаслигимиз керак!

Шомуродов Гасперининг ҳар қандай синовига тайёр!

Файзуллаев ўзини "қийнаган" мураббийдан қутилди!