Дана Уайт: "Жон Жонснинг Оқ уйдаги турнирда жанг қилиш эҳтимоли — миллиарддан бирга тенг"

UFC президенти Дана Уайт ММА афсонаси Жон Жонснинг Оқ Уйда бўлиб ўтадиган тарихий турнирда жанг қилиш эҳтимолини кескин рад этди.

Турнирга ҳали камида тўққиз ой вақт бор, бироқ тайёргарлик аллақачон бошланган. Гап - логистика, техник жиҳатлар ва бошқа масалалар устида иш кетмоқда. Бир неча жангчилар президент қароргоҳи майсазорида жанг қилиш истагини билдиришмоқда. Мераб Двалишвили – "ҳозирча ягона америкалик (грузиялик) эркак UFC чемпиони" сифатида марказий баҳсда иштирок этиши кераклигини айтмоқда. Конор Макгрегор аллақачон жараёнга қўшилган. Шундан сўнг Жон Жонс эса допинг назорати тизимига қайтиб, қатнашишга тайёрлигини билдирди.

Бироқ Дана Уайт бу масалага кескин изоҳ берди.

"Мен Конорга ишонаман. У ҳеч қачон алдамаган, фақат жароҳат олганида жанг қолдирган. Жонс-чи? Мен ундан шубҳаланяпман. У ҳам допинг тестларига қайтди, лекин биз ҳали Жон билан жанг бўйича гаплашмадик. Агар у билан нимадир юз берса, турнир хавф остида қолиши мумкин. Шу боис бундай таваккал қила олмаймиз. Менимча, Жон Жонснинг Оқ уйдаги турнирда жанг қилиш эҳтимоли — миллиарддан бирга тенг", — деди UFC раҳбари.

Эътиборлиси шундаки, Дана Уайт бу орқали Жон Жонсни Конордан ҳам паст қўйди — сўнгги йилларда жанглардан кўра барларда муштлашиш ва шов-шувли кечаларда иштирок этиши билан тилга тушган Макгрегорга нисбатан ҳам Жонснинг "ишонч кредити"ни йўқотгани очиқ-ойдин кўриниб турибди.