“Барса” Левандовски ва Фати ўрнини биттада босадиган ҳужумчи олиб келади

“Барселона” мутасаддилари “Манчестер Юнайтед”га керак бўлмай қолган Маркус Рэшфордни қўлга киритиш учун Европа клублари билан рақобатлашишга тайёр.

Sport.es нашрининг ёзишича, каталонияликлар 27 ёшли ҳужумчини олишга ҳаракат қилаётгани бир неча сабабларга боғлиқ.

Биринчидан, “Барселона” бош мураббийи Ханс-Дитер Флик Рэшфорднинг бир бирга ўйнаш маҳоратини юксак баҳоламоқда ва каталонияликларга рақиб ўйинчиларини яккама-якка тўқнашувда алдаб ўтадиган чап қанот ҳужумчисига эҳтиёжи борлигини таъкидламоқда.

Иккинчидан, жамоада ўйин амалиётига эга бўлмаётган Ансу Фати тез орада Каталониядан кетади ва унинг ўрнини клуб Рэшфорд ёрдамида тўлдириб, ҳужумкорлик салоҳиятини оширмоқчи.

Учинчидан, каталонияликлар англиялик ҳужумчининг универсаллигини алоҳида қадрламоқда ва Маркус керак паллада марказий форвард вазифасини бажариб, Роберт Левандовскининг ўрнини босиши мумкин.