Англиядаги ўртоқлик ўйинини майдонга катафалк машина бостириб киргани сабабли тўхтатилди !

Европанинг барча клублари ҳозирда янги мавсумга тайёргарлик кўраётганидан хабарингиз бор. Айрим жамоалар 2 ҳафтада расмий ўйинларда иштирок этишни бошласа, яна айрим жамоалар 7 кундан сўнг яшил майдонга чиқиб келади. Барчаси Европанинг қайси мамлакат клуби эканлиги билан боғлиқ.
АПЛ клублари бемалол хорижда ўқув-йиғин машғулотларини ўтказиш имкониятига эга. Масалан, "Челси" ва "МЮ" сингари клублар ҳозир АҚШда бўлиб турибди. "Туманли альбион"даги қуйи лига вакилларида эса бундай имконият мавжуд эмас. Шу боис, улар ўзлари сингари кичик бюджетга эга жамоалар билан ўртоқлик ўйинларини ташкил этишга мажбур.

Англиянинг энг қуйи лигаларида мавсум 3-4 кундан сўнг старт олади. Шу боис, кўплаб қуйидаги клублар сўнгги машғулот сифатида расмий ўртоқлик ўйинлари ташкил этишни бошлаб юборган.

Жума куни даража борасидаги бешинчи ўринда турувчи миллий лига аъзоси "Гейтсхед" ўз уйида даража борасида саккизинчи поғонада турувчи "Данстон" клуби билан ўртоқлик ўйинини ўтказди. Баҳсга старт берилгач, кўп ўтмай уни ғалати бир воқеа сабабли тўхтатишга тўғри келди.

Мухлисларнинг айтишича, ўйин давом этаётган майдонга кутилмаганда оламдан ўтган инсонларни сўнгги манзилга кузатиб қўйиш учун махсус мослашган "катафалк" машина келиб тўхтаган. Унинг ортида эса яна бир оддий машина майдонга кириб келди. Улар майдон марказида тинмай айланганча, қандайдир қоғозларни майдонга улоқтиришган. Қоғозларни барчаси майдон бўйлаб ташлангандан сўнг катафалк ҳайдовчиси машинадан тушди.

Унинг юзида қора ниқоб борлиги учун шахсни аниқлашнинг имкони бўлмади. Қаҳрамонимиз нариги машинага ўтирганча, хотиржамлик билан майдонни тарк этди.

Бўлаётган воқеаларни эса юқоридан полиция вертолёти хотиржам томоша қилиб тургани айтилмоқда. Қизиқувчан футбол ишқибозлари тарқатилган варақаларда нима акс этгани билан қизиқади. Қоғозларнинг барчасида биргина матндаги икки сурат бўлиб, бу ушбу жамоада фаолият олиб бораётган икки шахс эканлиги маълум бўлди.

Кейинроқ маълум бўлишича, бу воқеа клуб сферасида фаолият олиб бораётган икки шахсга нисбатан қилинган норозилик намойиши экан. Ниқобдаги "катафалк" ҳайдаб келган йигитлар шу тариқа вояга етмаганларга нисбатан қонунни бузганликда айблаб, уларни ишдан олинишини клубдан талаб қилган.
Ушбу воқеа бутун Европада кенг муҳокама қилинди. Ҳозирча, "Гейтсхед" жамоаси бу борада расмий баёнот бергани йўқ.

Я.У