«Андижон» «Сўғдиёна»га нега ютқазди?

SPORTS.uz сайти журналисти – Яҳёхўжа Улуғхўжаев Суперлиганинг 9 туридан ўрин эгаллаган “Андижон” – “Сўғдиёна” баҳсидан сўнг, ўз телеграм каналида баҳсга оид изоҳ қолдирди. Унинг айтишича, баҳс кутилганидек бошланганига қарамай, мезбонлар қўпол хатога йўл қўйгани сабабли аламли мағлубиятни қабул қилиб олган.

“Ўйиндан аввалги “Ўзбекча футбол”да “Суғдиёна” жамоасини водийдан 3 очко билан қайтиши борасида фикр билдирган эдим. Видеода  бу тахмин нимага асослангани ҳақида батафсил тушунтириб берганман (албатта томоша қилинг).

“Бургутлар” (шахмат тилида айтилганидек) дебютни жуда яхши бошлади. Эрта прессинг, интенсив ҳимояланиш ва агрессив қарши ҳужумлар кўрдик, аммо бу ўйин биринчи голдан кейин секин аста йўқолиб борди. “Андижон”нинг актив старти сабабли “Суғдиёна” илк 30 дақиқаликда ҳатто ҳимоядан чиқишга қийнала бошлади. 

Иккинчи тайм стартиданоқ “Андижон” дадил тузилган ўйин стратегиясини  классик “Хомяков тайм”га алмашди. Натижада, Бошкович шогирдлари осонлик билан тўп назоратини ўз қўлига олди. Аввалгидек ҳимоядан чиқишдаги браклар йўқолиб, тотал назорат жиззахликлар томонига ўтди. Кейин, майдон эгалари ҳақли қизил карточкани қабул қилиб олди. Бу карточка “Андижон”нинг майдондаги назоратни қўлдан чиқаргани ортидан келиб чиқди.

Баҳс қаҳрамони сўзсиз Санжар Шоаҳмедов! Барибир “катта” футболчиларнинг таркибда бор эканлиги мана шундай оғир ўйинларда қўл келади. “Андижон”га ажойиб дебют учун респект, аммо 90 дақиқа футбол ўйнашга уринган “Сўғдиёна” ҳақли ғалабага эришди.

Баҳсли пеналти борасида эртага алоҳида пост қолдираман.”

Эслатиб ўтамиз, бу мағлубиятдан сўнг, “Андижон” 9 очко билан турнир жадвалида ўз ўрнида қолди. “Сўғдиёна” эса, қуйи лигаларга равона қилувчи ўринлардан анча узоқлашиб олишга муваффақ бўлди. Жиззахликлар ҳисобида 8 ўйиндан сўнг 8 очко мавжуд.