Анчелотти Неймарни нега Бразилия термасига чақирмади?

Бразилия терма жамоасининг янги бош мураббийи Карло Анчелотти июнь ойидаги йиғинга “Сантос” ҳужумчиси Неймарни чақирмади.

Италиялик мутахассис ўз қарорини қуйидагича тушунтириб берди.

- Мен яхши спорт формасида бўлган футболчиларни танлашга ҳаракат қилдим. Неймар яқинда жароҳат олганди. Унинг терма жамоа учун муҳим ўйинчи экани ва ҳар доим шундай бўлиб қолишини ҳамма билади.

Ҳозир кўп ўйинчилар жароҳатдан азият чекяпти ва уларни худди Неймар каби терма жамоага жалб қилиб бўлмайди. Бразилияда иқтидорли ўйинчилар жуда кўп.

Неймар масаласида биз унга ишонишимизни айтишим керак. Бутун Бразилия унга ишонади. У Бразилияга бўлажак жаҳон чемпионатига ҳар томонлама пухта тайёргарлик кўриш учун қайтган. Мен у билан гаплашдим ва қароримни тушунтирдим. У фикрларимга тўлиқ қўшилди, - деди Карло Анчелотти.

Бразилия терма жамоаси 2026 йилги жаҳон чемпионати саралаш турнири доирасидаги навбатдаги учрашувларни Эквадор в Парагвай футболчиларига қарши ўтказади.