Витиньянинг “Реал”га ўтишига учта сабаб айтилди
- 2-апрел, 13:33
- Zohir Toshxo’jayev
- 0
- Футбол
Мадриднинг “Реал” клуби мутасаддилари Европа Чемпионлар лигасининг амалдаги ғолиби “Пари Сен-Жермен”нинг етакчи ўйинчиси Витиньяни сотиб олиш вариантларини ўрганмоқда.
Мадридликлар Франция клуби Чемпионлар лигасида ўз унвонини ҳимоя қилиш жараёнида португалиялик футболчи трансферини муҳокама қилишни истамаяпти. Бу ҳақда Испаниянинг Cadena Ser портали хабар берди.
Шунга қарамай, нуфузли манба Витинянинг “Қироллик клуби”га ўтиш эҳтимолини ошираётган учта сабабни келтириб ўтди.
Биринчидан, Витинья ва ПСЖ ўртасида футболчини 100 миллион евро эвазига бошқа жамоага ўтиши мумкинлиги ҳақида келишув мавжуд.
Иккинчидан, Париж ва Мадрид клублари ўртасидаги муносабатлар ҳозир бир неча ой аввалгидек кескин эмас, вазият анча юмшаган.
Учинчидан, 26 ёшли ярим ҳимоячи Париж клубидаги фаолияти босқичидан сўнг янги чақириқларга очиқ.
Жорий мавсумда Витинья барча мусобақаларда 41 та ўйинда иштирок этди, уларда 7 та гол ва 10 та голли узатма амалга оширди. Унинг клуб билан амалдаги шартномаси 2029 йил ёзигача мўлжалланган. Transfermarkt портали маълумотига кўра, футболчининг бозор қиймати 110 миллион еврони ташкил этади.