Юртимизда коронавирус пандемияси туфайли жорий этилган карантин секин-аста юмшатилмоқда. Бирин-кетин вирусдан фориғ бўлган вилоятларда ҳаёт аввалгидек бўла бошлаяпти. Бу эса футбол баҳслари ҳам озгина вақтдан сўнг бошланиб қолишини англатади.

Айрим давлатлар лигаларни тўхтаган ҳолатида тугатмоқда, баъзилар мавсумни якунлаб қўймоқчи ваҳоказо. Хўш биздачи? Бизда бу жараён қандай кечади? Эндигина бошланган Суперлига маълум вақт мухлисларсиз ўтиши айтилди холос.

Қолгани тахминан қандай бўлишини билиш мақсадида мутахассисларга юзландик. “Спорт” телеканали шарҳловчиси Бобур Акмалов саволларимизга жавоб берди.

- Карантиндан кейин ўзбек ва хориж футболини қандай тасаввур қиласиз? Ўзгаришлар бўлиши мумкинми?

- Карантиндан кейинги футбол қаерники бўлса ҳам сифати тушса керак. Чунки уйда шуғулланса-да, спортчиларнинг, футболчиларнинг жисмоний ҳолати чўкади. Аввалги талабга жавоб бермайди. Шунинг боис маълум вақт олдингидан кўра пастроқ сифатли футболни кўришимиз мумкин.

Ўзгаришлар. Карантин қоидаларига амал қилиб, ниқоб тақиб, қўл бериб сўрашмасдан, масофа сақлаган ҳолда стадионга кирадиган одамларни текшириш билан футбол давом этади. Асосан трансляцияларга урғу берилади.

Тақвимларга етиб олиш учун жуда кўп вақт, асаб ва куч керак бўлади. Буни обдон ўйлаш лозим. Ўйинларни тўлдириш, чемпионатлар, катта турнирлар, балки баъзилари умуман бекор қилинар.

“Спорт” телеканали шарҳловчиси Мурод Ризаев футболдаги мавжуд қоидадан норози, уни бекор қилиш тарафдори

- Суперлигани энди қандай ўтказишни таклиф қиласиз?

- Менга қолса Суперлигани қисқа вақт ичида ўтказиб олардим. Жамоаларни бир жойга йиғиб, Тошкент шарҳи ёки Тошкент вилоятига жамлаб, ҳамма чораларни кўриб, стадионлар бир-бирига яқин бўлган жойларга, икки даврали тизимдан воз кечиб, бир даврали ўйинлар қилиб ўтказиб юбориш тарафдориман. Бир кунда керак бўлса 3-4 та учрашувлар ташкил этиб. Дейлик Тошкентдаги 4 стадионда. Мисол учун, эрталаб 10да, кечки пайт 4, 6да... Мухлислар стадионга бормагандан кейин, трансляция қилинганда вақтнинг унчалик аҳамияти бўлмаса керак. Нисбатан салқинроқ пайтларда. Агарда беллашувлар кузда ўтказилса, ҳар икки соатда ташкил этиш мумкин. “Миллий”, “Пахтакор”, “Жар”, ТТЙМИ ва Тошкент вилоятларидаги стадионларда ўйнаш мумкин.

Диёр Имомхўжаев: ПФЛ эҳтиёткорлик юзасидан рухсат сўраган

Менга қолса, Суперлиганинг қолган қисмини Ўзбекистон Лига кубогига ўхшаб олимпия тизимида ўтказиб юборардим. Чемпион, 2-ўрин, 3-ўрин ваҳоказо. Шунда ўйинлар кам бўлади. Плей-офф тизимида жамоалар чиқиб кетаверади. Ҳамма бир-бири билан ўйнаши шарт бўлмайди. Ҳозир бошқачасининг иложи йўқ. Шунда ўринларни ва ОЧЛда иштирок этадиганларни аниқлаш асосий мақсад бўларди.

- Европада футбол чемпионатларининг давом этиши кўпроқ пулга боғлиқми ёки чемпионни аниқлашга?

- Унисига ҳам, бунисига ҳам. Мисол учун, Англияда футбол – бизнес, тижорий лойиҳа. Улар Премьер лигани ўтказиш тарафдори. Бунинг орқасидан миллиардлар йўқотади. Шунинг учун бу ерда тижорат ва пул устувор мақсад. “Ливерпул”нинг чемпионлиги жамоа мухлисларига кўпроқ керак. Сабаби клуб 30 йил деганда энди кубокни боши узра баланд кўтаради. Агар вазият танг бўлса “Ливерпуль” чемпионликни майдонда эмас қоғозда нишонлаши мумкин. Бундан бошқа иложи йўқ.

Англия, Испания ва умуман кучли бешлик лигаларида чемпионликдан кўра пул муҳимроқ, деб ўйлайман. Аммо шундай биринчиликлар борки, тижорий томондан ҳеч қанақа манфаати йўқ, уларда чемпионликни аниқлаш қолади холос.

- Чемпионатларда чемпионни кай тарзда аниқлаш керак, деб ҳисоблайсиз?

- Ҳамма чемпионатга бир хил мезон қўйиб бўлмайди. Юқорида айтиб ўтганимдек, кучли бешлик бор, ундан кейин турадиган Португалия, Россия, Туркия, Нидерландия, Бельгия чемпионатлари мавжуд. Буларда тош-тарози турлича. Шунинг учун баъзилар чемпионатни тўхтатди, айримлар қуръа йўли билан аниқламоқда, кимдир мусобақа тўхтаган жойида эълон қиляпти ёки натижалар бекор қилиниши мумкин. Мавсумни тугатиб қўйиш тарафдорлари ҳам бор. Шу боис мамлакатлар ичкаридаги вазиятдан келиб чиқиб, қарор қабул қилса, ана шуниси маъқул. Ўзбекистон чемпионати борасида эса юқорида фикрларимни билдириб ўтдим.

Миллий ва олимпия термаларимизнинг ўзига келиб олиши қийин кечади. Чунки футболчилар доимий равишда машғулотларда ишлари лозим ва яна бир яхши томони Суперлигамиз максимал тарзда ўтказилиб юборилса, кейин Вадим Абрамов миллий терма жамоамизни бир жойга йиғиб, футболчиларнинг соғлигини назорат қилиб, шуғулланиши, балки икки томонлама ўйинлар ўтказиш орқали уларни расмий учрашувларгача бир маромда ушлаб туриши мумкиндир. Расмий баҳслар қачон бўлиши номаълум. Яна бир плюс томони, ЖЧ-2022 саралашидан ўрин олган беллашувда ёзнинг жазирамасида Саудия Арабистонига сафар уюштиришимиз керак эди. Агар пандемия сабаб бу ўйин салқинроқ пайтда ўтказилса, яхши бўларди. Буларнинг барчаси, ФИФА, ОФК ва ЎФАга боғлиқ.