Чемпионлик жангида “Арсенал”ни тўхтатиш яна Ҳусановга топширилади
- 17-апрел, 06:22
- Zohir Toshxo’jayev
- 0
- Футбол
Англия Премьер-лигасининг 32-тури чемпионлик курашида кескин бурилиш ясади. Узоқ муддатдан бери пешқадамлик қилаётган ва чемпионликка асосий номзод бўлиб турган “Арсенал” бу турда кутилмаганда ўз майдонида “Борнмут”га 1:2 ҳисобида ютқазди.
“Канонирлар”ни таъқиб қилиб келаётган “Манчестер Сити” Лондонда “Челси” 3:0 ҳисобида мағлуб этганидан кейин Хосеп Гвардиола шогирдларида “Арсенал” билан тенглашиб олиш имконияти пайдо бўлди.
Бунинг учун “шаҳарликлар” 19 апрель куни “Арсенал”ни ўзаро тўқнашувда енгиши ва 31-турнинг қолдирилган ўйинида “Кристал Пэлас”дан ҳам уч очко олиб, жами олти баллик тафовутни йўққа чиқариши керак. Ҳар икки ўйин “Этиахад” стадионида ўтиши манчестерликлар учун қўшимча мотивация ҳисобланади.
Чемпионатнинг муҳим палласига келиб, “Арсенал” бироз толиқиб қолгани кўзга ташланяпти. “Манчестер Сити” эса, аксинча, ўйинини анча тартибга солиб олди.
Айни пайтда Англия футболи экспертлари “Манчестер Сити” ва “Арсенал” ўртасидаги мавсумнинг ҳал қилувчи учрашуви олдидан жамоаларнинг имкониятларини таҳлил қилмоқда.
“Манчестер Сити” фаолиятини ёритиб келаётган cityxtra.co.uk сайти экспертлари Хосеп Гвардиола бўлажак тўқнашувда бошланғич таркибда қайси футболчилари хизматидан фойдаланиши лозимлиги ҳақида маълумот чиқарди.
Жанлуижи Доннарумма
Жанлуижи Доннарумма ўз дебют мавсумида Премьер-лигада 12-марта дарвозасини гол ўтказмасдан сақлаб қолди. Бу кўрсаткич бўйича Европанинг бешта кучли лигасида фақат беш нафар дарвозабон ундан яхшироқ натижа кўрсатган холос.
Италиялик дарвозабон “Сити”нинг чемпионлик курашида ҳал қилувчи роль ўйнамоқда ва энг муҳим учрашувларда юқори даражадаги маҳоратини намойиш этмоқда. Агар “Сити” бу гал ҳам баҳсдан йўқотишсиз чиқмоқчи бўлса, Доннарумма яна энг яхши ўйинини кўрсатиши керак бўлади.
Матеуш Нуньеш
Матеуш Нуньеш бу мавсумда ўз фаолиятидаги энг яхши формасини кўрсатяпти ва бундай даражадаги ўйинда унинг асосий таркибдаги ўрни деярли кафолатланган.
Португалиялик футболчи март ойида “Арсенал”га қарши Лига кубоги финалида голли пас берган эди. Унинг ўнг қанотда Антуан Семеньо билан ўзаро ҳаракатлари жамоа ўйинида муҳим аҳамиятга эга бўлиб келмоқда.
Абдуқодир Ҳусанов ва Марк Гехи
Ҳимоя марказида Абдуқодир Ҳусанов ва Марк Гехи жуфтлиги қисқа вақт ичида ишончли тандемга айланди.
Ҳусанов ҳар бир ўйинда ўсишни намойиш этиб, мухлислар меҳри билан бирга ҳатто энг ашаддий танқидчилар ишончини ҳам қозонмоқда. Эътиборли жиҳати шундаки, “Манчестер Сити” Ҳусанов бошланғич таркибда майдонга тушган учта учрашувда ўз дарвозаси дахлсизлигини сақлаб қолди.
Хусусан, 22 март куни Англия лигаси кубоги финалида “Арсенал”ни 2:0, 4 апрель санасида Англия кубоги чорак финалида “Ливерпуль”ни 4:0 ва Премьер-лиганинг 32-турида “Челси”ни 3:0 ҳисобида енгди. Бу тўқнашувларнинг барчасида Абдуқодир Ҳусанов ҳимояни мустаҳкамлаб ушлаб, кучли ҳужумчиларга дарвозага хавф солиш имконини бермади.
Марк Гехига келсак, унинг ўтган якшанба куни “Челси”га урган голи ва навбатдаги “қуруқ” ўйини “Сити” бу ҳимоячини нега қўлга киритиш учун шунчалик кучли ҳаракат қилганини яққол кўрсатди.
Тасодиф эмаски, айнан шу футболчи билан шартнома имзолангандан кейин “Сити” ҳимояси янгиланган кўриниш олди ва ўта ишончли Ҳусанов – Гехи тандеми пайдо бўлди.
Райан Айт-Нури
“Арсенал” билан бўладиган ўйинда ўтган якшанба куни жароҳат олган Нико О'Райли ўрнига Райан Айт-Нури асосий таркибда майдонга тушиши эҳтимоли юқори.
Айт-Нури ушбу мавсумда кам вақт берилаётганига қарамай, ажойиб ўйин намойиш этди ва “Челси”га қарши баҳсда захирадан тушиб, юқори техник маҳоратини яна бир бор тасдиқлади.
Албатта, агар О'Райли “Арсенал”га қарши ўйинга тайёр бўлмаса, унинг йўқлиги катта йўқотиш бўлади, аммо захира вариант сифатида Айт-Нуридан яхшироқ танлов йўқ.
Родри
“Челси”га қарши ўйинда Родри баъзи пайтларда формасидан ташқари кўринган бўлса-да, испаниялик ярим ҳимоячи деярли барча ҳужумларни осонлик билан тўхтатди.
Албатта, Нико Гонсалес кўпроқ ўйин вақтига лойиқдек кўринади, аммо бундай даражадаги ўйин вазиятни ўзгартириши эҳтимоли кам.
“Арсенал”га қарши баҳс “Олтин тўп” соҳиби учун ўз имкониятларини намойиш қилиш учун идеал имкониятдир.
Райан Шерки
Франциялик плеймейкер алоҳида таништиришга муҳтожмас, унинг сўнгги ўйинларини таърифлаш учун сўзлар етарли эмас. Асосий таркибдаги қисқа танаффусдан кейин Шерки ўз ўрнини тўлиқ хизматлари билан қайтариб олди.
Дам олиш кунларида икки голли пас берганидан кейин, эҳтимол, “Арсенал”нинг мустаҳкам ҳимоясини ёриб ўта оладиган футболчи айнан Шерки экани маълум бўлди.
Бернарду Силва
Жамоа сардори Бернарду Силва албатта, ушбу дам олиш кунларида жамоани майдонга олиб чиқиши кутиляпти. “Манчестер Сити”даги сўнгги мавсумида 31 ёшли футболчи аллақачон бир марта кубокни боши узра кўтарди ва янги совринлар учун курашда барчадан кўра кўпроқ ғалаба қозонишга интилади.
У аллақачон клуб афсоналари қаторига кирган бўлса-да, ушбу вазиятни ўзгартириб, бир вақтлар имконсиз туюлган чемпионликни қўлга киритса, унинг мақоми янада мустаҳкамланади.
Антуан Семеньо
Антуан Семеньо сўнгги ўйинда гол урмаган бўлса-да, майдонда бўлганида голлар ҳар доим яқиндек туюлади. У ҳали “Арсенал”га гол урмаган, аммо сўнгги ўйинда ўнг қанотда рақиб ҳимоячисига катта муаммолар туғдирганди.
Эрлинг Холанд
Ҳужумда эса, албатта, Эрлинг Холанд ўйнайди. Норвегиялик тўпурар сўнгги пайтларда танқид қилинган бўлса-да, унга қарши ўйнаш ҳар қандай рақиб учун жуда хавфли.
Агар лигадаги энг кучли жамоа ҳимоясини қандай ёриб ўтишни биладиган футболчи бўлса, у айнан Холанддир.
Жереми Доку
“Стэмфорд Бридж”да Жереми Доку мавсумдаги бешинчи голини урди ва барча мусобақаларда 14-голли ҳаракатда иштирок этди. Ўйиндан кейин бельгиялик ҳужумчи кўпроқ гол урмоқчи эканини айтди ва чемпионлик кураши ҳақиқатан бошланганига ишонч билдирди.
Асосий таркиб: Доннарумма; Нуньес, Ҳусанов, Гехи, Айт-Нури; Родри, Бернарду, Шерки; Семеньо, Холанд, Доку
Захира: Траффорд, Аке, Нико, Ковачич, О'Райли, Рейндерс, Фоден, Савиньо, Мармуш.