Сергей Арслонов: "Шуни вада берамизки, юқори натижаларга эришиш учун максимал даражада ҳаракат қиламиз"

Маълумки, “Андижон” клубида мураббийлар штаби ўзгарди. Эндиликда вақтинчалик бош мураббий Ислом Аҳмедовга катта мураббий сифатида Сергей Арслонов яқиндан ёрдам бера бошлади. 

Куни кеча клуб матбуот хизмати Сергей Сергеэвичдан дастлабки интервюни олди. 

- Сергей Сергеевич, “Андижон”да иш бошлашингиз сиз учун янги чақирувдир ва сизни табриклаймиз. Бу таклиф сиз учун кутилмаганда бўлдими?

- Биринчи навбатда табрик учун раҳмат. Тўғри таъкидлаб ўтдингиз, бу мен учун катта таклиф. Жамоадаги ўйинчилар анча шаклланган ва кучли савиядаги футболчилар жамланган. “Андижон” ўзига хос жамоа ва катта тарихга эга бўлган клублардан бири деб ҳисоблайман. Албатта, жамоа анъаналарига эга бўлган ажойиб жамоа. Бу ерда яхши шароитлар яратилган. Шу билан бирга бу ердаги мухлисларни алоҳида таъкидлаб ўтиш керак. Албатта, ҳозирги вазиятда турнир жадвалидан келиб чиқиб барчамиздан масъулият билан иш юритишни талаб қилади. Олдимизда масъулиятли вазифа турибди. Жамоа ва мухлислар ишончини қозонишимиз учун ҳар бир учрашувда ғалаба қозонишимиз керак. Биздан нимаики талаб қилинаётган бўлса, бунинг учун бор кучимиз билан меҳнат қиламиз ва олдинга интиламиз.

- Ўтган йили клуб базаси фойдаланишга топширилди. Инфраструктура тубдан яхшиланди. Хўш, клуб қароргоҳи сизга ёқдими?

- Тўғрисини айтаман, биринчи марта бу ердаман. Олдин эшитгандим. Ўзим яратилган шароитларни кўрдим ва ҳиссиётларим бошқача, таассуротларим улкан. Биласизми, бу ерда энг асосийси, футболчилар учун ҳамма шарт-шароитлар муҳайё қилинган. Ўйинчиларни тикланиши, ўйинга тайёргарлик жараёнлари учун бу ерда барча нарса бор. Майдон чими, базадаги ҳамма жиҳозлар, имкониятларни албатта таъкидлаб ўтишим керак. Футболчиларни ўсиши ва уларни янада кучли ўйинчи бўлиб етишишлари учун базада ҳамма шароитлар яратиб қўйилган. 

- Футболчиларни ҳозирги ҳолати ва жамоани имкониятлари қандай?

- Юқорида айтиб ўтганимдек, клубда тажрибали ўйинчилар йиғилган. Олдинги мураббийлар штаби селексияц ишларини олиб боришди. Барча йиғилган ўйинчилар ўзига яраша маҳоратли. Имкониятларимиз ҳақида тўхталсам, ҳозирча бунга эрта. Шуни вада берамизки, юқори натижаларга эришиш учун максимал даражада ҳаракат қиламиз. Бу нафақат футболчиларга, балки мураббийлар штаби ҳам бу борада максимал ҳаракат қиламиз. Мухлисларимизни хурсанд қилиш учун барча имкониятларимизни ишга соламиз.