Шомуродов энди АҚШда ўйнайди!
- 11-март 2025, 05:11
- Zohir Toshxo’jayev
- 0
- Футбол
Италия чемпионати А Сериясининг янги президенти Эцио Симонелли лига нуфузини янада ошириш мақсадида янги ғояни илгари сурмоқда.
Нуфузли манба – ESPN журналистларининг маълум қилишича, лига раҳбари юқори дивизион жамоалари иштирокидаги чемпионат ўйинларини мамлакат ташқарисида, яъни АҚШ майдонларида ўтказиш масаласини кўтарди.
- Биз миллий чемпионат учрашувларини АҚШда ташкил қилган биринчи лига бўлишни истаймиз. Бу биз катта ишонч билдираётган бозор бўлади. Бугунги кунда А Лиганинг 20 та жамоасидан тўққизтасига америкаликлар ва биттасига канадаликлар эгалик қилмоқда. Бизда бошқа харидорлар ҳам бор, - деди Эцио Симонелли.
Италия А Серияси жаҳон футболидаги энг қудратли лигалардан ҳисобланади. Хусусан, УЕФА коэффициентлар жадвалида А Серия Англия ва Испания чемпионатларидан кейин учинчи ўринда қайд этилган.
Бу мусобақа 1898 йилдан буён ташкил этиб келинади. Дастлаб, бу мусобақа минтақавий миқёсда гуруҳларга бўлинган ҳолда ўтказилган. 1929 йилдан мусобақа формати ҳозирги кўринишга ўзгарди.
Италияда биринчи ташкил этилган жамоа “Женоа” ҳисобланади. Бу жамоа А Сериянинг биринчи чемпиони ва уч марта кетма-кет лигада ғолиб чиққан. Қизиғи шундаки, “Женоа” ўзбекистонлик футбол ишқибозларига бегона эмас. Ўзбекистон миллий терма жамоаси сардори Элдор Шомуродов Италиядаги фаолиятини айнан генуяликлар клубида бошлаган.
2020 йилнинг октябрида Россия Премьер-лигасининг “Ростов” жамоасидан “Женоа”га кўчиб ўтган ўзбек футболчиси 31 та учрашувда саккизта гол уриб, ўзини италиялик мухлису мутахассисларга танитган эди.
Бугунги кунда “Женоа” ҳам америкаликларга тегишли. Бундан ташқари, “Интер”, “Рома”, “Милан”, “Фиорентина”, “Аталанта”, “Болонья”, “Венеция”, “Парма”га ҳам АҚШ биснесменлари эгалик қилиб келади.
Хусусан, Элдор Шомуродов ўйнаётган “Рома” клубини америкалик бизнесменлар – Фридкинлар оиласи молиялаштиради.
Таъкидлаш жоизки, агар А Серия ўйинларини АҚШ майдонларида ўтказишга қарор қилинса, бу клуб хўжайинларининг барчаси ушбу ғояни тўлиқ қўллаб-қувватлайди. Аслида АҚШда А Серия учрашувларини ташкил этиш бўйича муайян ишлар олиб борилмоқда ва бу масала ижобий ечим топиши кутиляпти.
Демак, ўзгариш амалга ошса, Элдор Шомуродов ҳам ўз маҳоратини Америка майдонларида кўрсата олади.
Шу ўринда, ёзги трансферлар ойнасининг ёпилиши арафасида легионеримизда АҚШ чемпионатига кўчиб ўтиш имкони бўлганини эслаб ўтиш жоиз. МЛСнинг “Атланта Юнайтед” жамоаси Элдор Шомуродовни қўлга киритиш учун жиддий ҳаракат қилган эди. Бироқ “Рома”нинг ўша пайтдаги бош мураббийи Даниэле де Росси ўзбек футболчисини жамоада олиб қолишга қарор қилган.
Элдор Шомуродов жорий мавсумда барча турнирларда 26 та учрашувда майдонга тушиб, бешта гол ва учта ассист муаллифи бўлди.